ମୁମ୍ବଇ: ପଞ୍ଜାବ ଏବଂ ମହାରାଷ୍ଟ୍ର କୋଅପରେଟିଭ ବ୍ୟାଙ୍କ(ପିଏମସି ବ୍ୟାଙ୍କ)ର ଆଉ ଜଣେ ଜମାକାରୀଙ୍କ ମୃତ୍ୟୁ ଘଟିଛି। ହୃଦ୍ଘାତରେ ତାଙ୍କର ମୃତ୍ୟୁ ହୋଇଥିବା ଜଣାପଡ଼ିଛି। ମୃତକ ହେଉଛନ୍ତି ୬୪ ବର୍ଷୀୟ କୁଲଦୀପ କୌର ବିଜ୍। କୁଲଦୀପଙ୍କ ମିଶାଇ ବର୍ତ୍ତମାନ ସୁଦ୍ଧା ମୋଟ ୭ ଜମାକାରୀଙ୍କ ମୃତ୍ୟୁ ଘଟିସାରିଲାଣି। ବ୍ୟାଙ୍କରେ ୪୩୫୫ କୋଟି ଟଙ୍କାର ଦୁର୍ନୀତି ହୋଇଥିବା ସାମ୍ନାକୁ ଆସିବା ପରେ ଟଙ୍କା ଉଠାଣ ଲାଗି ଜମାକାରୀଙ୍କ ଉପରେ କଟକଣା ଜାରି କରାଯାଇଛି। ଫଳରେ ବ୍ୟାଙ୍କରେ ଲକ୍ଷ ଲକ୍ଷ ଟଙ୍କା ଜମା କରିଥିବା ଜମାକାରୀମାନେ ଟଙ୍କା ଉଠାଣରେ ସମସ୍ୟାର ସମ୍ମୁଖୀନ ହେଉଛନ୍ତି। ଏହାକୁ ନେଇ ଚାପରେ ରହିବା ଫଳରେ ଜମାକାରୀଙ୍କ ମୃତ୍ୟୁ ଘଟୁଥିବା ଜଣାପଡ଼ିଛି।
ଅନ୍ୟପଟେ ବ୍ୟାଙ୍କରୁ ନଗଦ ଟଙ୍କା ଉଠାଣ ଲାଗି କଟକଣା ହଟାଇବାକୁ ଦିଲ୍ଲୀ ହାଇକୋର୍ଟରେ ହୋଇଥିବା ଆବେଦନ ଉପରେ କେନ୍ଦ୍ର ସରକାର ଏବଂ ଆରବିଆଇକୁ ନୋଟିସ ଜାରି କରାଯାଇଛି। ହାଇକୋର୍ଟ ମୁଖ୍ୟ ବିଚାରପତି ଡି.ଏନ. ପଟେଲ ଏବଂ ଜଷ୍ଟିସ ସି. ହରିଶଙ୍କରକଙ୍କୁ ନେଇ ଗଠିତ ଖଣ୍ଡପୀଠ ଅର୍ଥ ମନ୍ତ୍ରଣାଳୟ, କେନ୍ଦ୍ର ସରକାର, ଆରବିଆଇ ଏବଂ ପିଏମସି ବ୍ୟାଙ୍କକୁ ଜବାବ ରଖିବାକୁ ନିର୍ଦେଶ ଜାରି କରିଛନ୍ତି।
