ବାଂଲାଦେଶ ବାୟୁସେନା ଘାଟିରେ ଆକ୍ରମଣ, ଜଣେ ମୃତ

ସମାଜ ଡିଜିଟାଲ ଡେସ୍କ: ବାଂଲାଦେଶର କୋକ୍ସ ବଜାର ନିକଟ ସମିତି ପାରା ଅଞ୍ଚଳରେ ଥିବା ଏକ ବାୟୁସେନା ଘାଟିରେ ସୋମବାର ଆକ୍ରମଣ ହୋଇଛି। ସମିତି ପାରା ଅଞ୍ଚଳର କିଛି ବିଦ୍ରୋହୀ ଏହି ଆକ୍ରମଣ କରିଥିବା ଜଣାପଡ଼ିଛି। ବାଂଲା ସରକାରଙ୍କ ଗୃହ ବ୍ୟାପାର ଉପଦେଷ୍ଟା ଏମ. ଜାହାଙ୍ଗୀର ଆଲମ ଚୌଧୁରୀ ଏକ ଖବରଦାତା ସମ୍ମିଳନୀରେ ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନାଙ୍କ ସହଯୋଗୀମାନେ ଦେଶରେ ଅସ୍ଥିରତା ସୃଷ୍ଟି କରୁଥିବା ଅଭିଯୋଗ କରିବା ପରେ ଏହି ଆକ୍ରମଣ ହୋଇଛି। ଜାହାଙ୍ଗୀର କହିଥିଲେ, ଦେଶରେ ଅରାଜକତା ସୃଷ୍ଟି କରୁଥିବା ଆତଙ୍କୀମାନଙ୍କୁ ଛଡ଼ାଯିବ ନାହିଁ। ଏମାନେ ସମସ୍ତେ ହସିନାଙ୍କ ଆୱାମୀ ଲିଗ୍‌ର ସହଯୋଗୀ ଦଳ ବୋଲି କହିଥିଲେ। ଏହା ପରେ ସମିତି ପାରା ଅଞ୍ଚଳର ବିଦ୍ରୋହୀମାନେ ବାୟୁସେନା ଘାଟି ଉପରେ ଆକ୍ରମଣ କରିଥିଲେ। ଘାଟି ଉପରକୁ ସେମାନେ ଗୁଳିମାଡ଼ କରିଥିଲେ। ଏଥିରେ ସମିତି ପାରା ଅଞ୍ଚଳର ୩୦ ବର୍ଷୀୟ ଶିହାବ କବିର ନାମକ ଜଣେ ଯୁବକଙ୍କ ମୃତ୍ୟୁ ଘଟିଛି। ବାୟୁସେନା ପକ୍ଷରୁ ପରିସ୍ଥିତିକୁ ନିୟନ୍ତ୍ରଣାଧୀନ କରିବା ଲାଗି ଉଦ୍ୟମ ଚାଲିଥିବା କକ୍ସ ବଜାର ଜିଲା ଆୟୁକ୍ତ ମହମ୍ମଦ ସଲାହୁଦ୍ଦିନ କହିଛନ୍ତି।