ନୂଆଦିଲ୍ଲୀ : କରୋନାର ନୂଆ ପ୍ରଜାତି ଭୂତାଣୁ ଓମିକ୍ରନର ସଂକ୍ରମଣ ଦେଶରେ ବଢିଚାଲିଛି। ସୋମବାର ସୁଦ୍ଧା ଦେଶରେ ଓମିକ୍ରନ ଆକ୍ରାନ୍ତଙ୍କ ସଂଖ୍ୟା ୧୬୧ରେ ପହଞ୍ଚିଥିବା କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭୀୟ ରାଜ୍ୟସଭାରେ କହିଛନ୍ତି। ମନ୍ତ୍ରୀ କହିଛନ୍ତି ଯେ ଓମିକ୍ରନ ଆକ୍ରାନ୍ତଙ୍କୁ ଚିହ୍ନଟ କରିବା ଲାଗି ମାସକୁ ୩୧,୦୦୦ ନମୁନାର ଜିନ୍ ଅନୁଶୀଳନ (ଜିନୋମ ସିେକ୍ବନ୍ସ) କରାଯାଉଛି। ଓମିକ୍ରନ ସଂକ୍ରମଣକୁ ନିୟନ୍ତ୍ରଣ କରିବା ଲାଗି ପ୍ରତିଦିନ ପରିସ୍ଥିତି ସମ୍ପର୍କରେ ବିଶେଷଜ୍ଞଙ୍କୁ ନେଇ ସମୀକ୍ଷା କରାଯାଉଛି। ଓମିକ୍ରନ ସଂକ୍ରମଣକୁ ରୋକିବା ପାଇଁ ଟିକାକରଣ ଉପରେ ଗୁରୁତ୍ବ ଦିଆଯାଉଛି। ବର୍ତ୍ତମାନ ସୁଦ୍ଧା ୮୮ ପ୍ରତିଶତ ଜନତା ପ୍ରଥମ ପାନ ଓ ୫୮ ପ୍ରତିଶତ ଦ୍ବିତୀୟ ପାନ ଟିକା ନେଇସାରିଲେଣି। ବର୍ତ୍ତମାନ ସୁଦ୍ଧା ଯେତେସବୁ ଓମିକ୍ରନ ଆକ୍ରାନ୍ତ ଚିହ୍ନଟ ହୋଇଛନ୍ତି ସେମାନଙ୍କ ଠାରେ ସାମାନ୍ୟ ଲକ୍ଷଣ ପ୍ରକାଶ ପାଇଛି। ମହାରାଷ୍ଟ୍ରରେ ସର୍ବାଧିକ ୫୪ଜଣ ଓମିକ୍ରନ ଆକ୍ରାନ୍ତ ଚିହ୍ନଟ ହୋଇଥିବାବେଳେ ଏହା ପଛକୁ ଦିଲ୍ଲୀରେ ୩୨ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି। ଜାତୀୟ ରାଜଧାନୀ ଦିଲ୍ଲୀରେ ସୋମବାର ଆଉ ୪ଜଣ ଓମିକ୍ରନ ଆକ୍ରାନ୍ତ ଚିହ୍ନଟ ହୋଇଛନ୍ତି। ଦିଲ୍ଲୀରେ ଓମିକ୍ରନ ସଂକ୍ରମଣ ବୃଦ୍ଧିକୁ ନେଇ ଡିଡିଏମ୍ଏ ପକ୍ଷରୁ ସମୀକ୍ଷା କରାଯାଇଛି। ଅନ୍ୟପଟେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ କହିଛନ୍ତି ଯେ ଓମିକ୍ରନ ସଂକ୍ରମଣକୁ ନିୟନ୍ତ୍ରଣ ପାଇଁ ପ୍ରତ୍ୟେକ କରୋନା ପଜିଟିଭିଙ୍କ ଜିନ୍ ଅନୁଶୀଳନ ଲାଗି ପଠାଯିବ। ଏହାଦ୍ବାରା ଓମିକ୍ରନ ସଂକ୍ରମିତଙ୍କୁ ଶୀଘ୍ର ଚିହ୍ନଟ କରାଯାଇପାରିବ।
ଓମିକ୍ରନ ଭୂତାଣୁ ସଂକ୍ରମଣକୁ ନେଇ ଗୁଜରାଟ ସରକାର ରାଜ୍ୟର ୮ଟି ସହରରେ ରାତ୍ରିକାଳୀନ କଟକଣାକୁ ଡିସେମ୍ବର ୩୧ ତାରିଖ ପର୍ଯ୍ୟନ୍ତ ବୃଦ୍ଧି କରିଛନ୍ତି। ଅହମଦାବାଦ, ଗାନ୍ଧୀନଗର, ସୁରତ, ରାଜକୋଟ, ବରୋଦା, ଭାବନଗର, ଜାମନଗର ଓ ଜୁନାଗଡରେ ରାତି ୧୨ଟାରୁ ଭୋର ୫ଟା ପର୍ଯ୍ୟନ୍ତ ସାଧାରଣ ଲୋକଙ୍କ ଯାତାୟାତ ଉପରେ କଟକଣା ଲାଗୁ କରାଯାଇଛି। ସେହିପରି ଏହିସବୁ ସହରଗୁଡିକର ଭୋଜନାଳୟରେ ୭୫% ଗ୍ରାହକକୁ ବସାଇ ଖାଦ୍ୟ ଦେବାର ନିୟମ କରାଯାଇଛି।
Comments are closed.