କାର ଧକ୍କାରେ ବୃଦ୍ଧାଙ୍କ ମୃତ୍ୟୁ

ଗୋପାଳପୁର: ଗୋଳନ୍ଥରା ଥାନା ଅନ୍ତର୍ଗତ କନିଷି ହାଟ ନିକଟରେ ୧୬ନଂ ଜାତୀୟ ରାଜପଥ ପାର ହେଉଥିବା ଜଣେ ବୃଦ୍ଧାଙ୍କୁ କାର ଧକ୍କା ଦେବା ଫଳରେ ତାଙ୍କର ମୃତ୍ୟୁ ଘଟିଛି। ମୃତ ବୃଦ୍ଧା ଜଣକ ହେଲେ ଜରଡ଼ା ଥାନା ଅଧୀନ ଖମ୍ବାରି ଗାଁର ବାସନ୍ତୀ ସାହୁ (୭୦)।

ସୂଚନା ଅନୁଯାୟୀ, ବାସନ୍ତୀ ରବିବାର ସକାଳୁ ଖମ୍ବାରି ଗାଁରୁ ଏକ ବସରେ ବସି ଗୋଳନ୍ଥରା ଥାନା ଅଧୀନ କୁଠାରଶିଙ୍ଗୀ ଆସୁଥିବା ବେଳେ ଭୁଲ ବଶତଃ ଗୋଳନ୍ଥରା ଠାରେ ଓଲ୍ହାଇବା ପରିବର୍ତ୍ତେ କନିଷି ହାଟକୁ ଚାଲି ଯାଇଥିଲେ। ସେଠାରୁ ଓହ୍ଲାଇ ରାସ୍ତା ପାର ହେଉଥିବା ବେଳେ ଇଚ୍ଛାପୁର ପଟୁ ଦ୍ରୁତ ଗତିରେ ଆସୁଥିବା ଏକ କାର ତାଙ୍କୁ ଧକ୍କା ଦେଇଥିଲା। ଫଳରେ ବୃଦ୍ଧା ଜଣକ ଗୁରୁତର ଆହତ ହୋଇଥିଲେ। ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ବ୍ରହ୍ମପୁର ବଡ଼ ଡାକ୍ତରଖାନାରେ ଭର୍ତ୍ତି କରିଥିବା ବେଳେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା। ଏ ନେଇ ମୃତ ବାସନ୍ତୀଙ୍କ ନାତି ଗୋଳନ୍ଥରା ଥାନାରେ ଲିଖିତ ଅଭିଯୋଗ କରିବା ପରେ ପୁଲିସ ଏକ ମାମଲା(୧୩୪/୨୫) ରୁଜୁ କରିବା ସହିତ ମୃତଦେହ ବ୍ୟବଚ୍ଛେଦ କରି ପରିବାର ବର୍ଗଙ୍କୁ ହସ୍ତାନ୍ତର କରିଛି।