ଭୁବନେଶ୍ବର: ଆସନ୍ତା ୨୬ତାରିଖରୁ ରାଜ୍ୟରେ ପଶ୍ଚିମାଝଡ଼ ପ୍ରଭାବରେ ବିଜୁଳି ଘଡ଼ଘଡ଼ି ସହ ଝଡ଼ତୋଫାନ ହେବାର ଆଶଙ୍କା ରହିଛି। ପବନ ଘଣ୍ଟା ପ୍ରତି ୩୦ରୁ ୪୦ କିମି ପର୍ଯ୍ୟନ୍ତ ବହିବାର ସମ୍ଭାବନା ରହିଛି। ୨୭ରୁ ବଢ଼ିବ ବର୍ଷା। ୨୭ରେ ୧୧ଟି ଉପକୂଳ ଜିଲା ସମେତ ପ୍ରଭାବିତ ହେବ ପାର୍ଶ୍ବବର୍ତ୍ତୀ ଜିଲା। ଏସବୁ ଜିଲାରେ ଜାରି ରହିବ ଝଡ଼ପବନ ଏବଂ ବିଜୁଳି ଘଡ଼ଘଡ଼ି ବୋଲି ଭୁବନେଶ୍ବର ପାଣିପାଗ ବିଜ୍ଞାନ କେନ୍ଦ୍ର ସତର୍କ ସୂଚନା ଜାରି କରିଛି। ଝାଡ଼ଖଣ୍ଡ, ତେଲଙ୍ଗାନା ଏବଂ ଦକ୍ଷିଣ ଛତିଶଗଡ଼ ସହିତ ଆଭ୍ୟନ୍ତରୀଣ ଓଡ଼ିଶା ପର୍ଯ୍ୟନ୍ତ ସମୁଦ୍ର ପତ୍ତନରୁ ଦେଢ କିମି ଉଚ୍ଚରେ ଏକ ଟ୍ରଫଲାଇନ ଏବଂ ପଶ୍ଚିମାଝଡ଼ ସକ୍ରିୟ ରହିଛି। ଏହାର ପ୍ରଭାବରେ ରାଜଧାନୀରେ ସର୍ବାଧିକ ୧୬ମିମି ବର୍ଷା ଏବଂ ଖୋର୍ଦ୍ଧାରେ ୦.୫ମିମି ରେକର୍ଡ ହୋଇଛି। ରାଜଧାନୀର କିଛି ଅଞ୍ଚଳରେ ବର୍ଷା ହୋଇଥିବା ବେଳେ ଆଉ କିଛି ଅଞ୍ଚଳ ଶୁଖିଲା ରହିଥିଲା। ଆସନ୍ତା ୨୪ ଘଣ୍ଟା ମଧ୍ୟରେ ବାଲେଶ୍ବର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, କଟକ, ଜଗତସିଂହପୁର, ପୁରୀ, ଖୋର୍ଦ୍ଧା, ନୟାଗଡ଼, ଗଞ୍ଜାମ, ଗଜପତି, କେନ୍ଦୁଝର, ମୟୂରଭଞ୍ଜ, ଢେଙ୍କାନାଳ, କନ୍ଧମାଳ, ମାଲକାନଗିରି, କୋରାପୁଟ ଏବଂ ରାୟଗଡ଼ାରେ ବିଜୁଳି ଘଡ଼ଘଡ଼ି ସହ ବର୍ଷା ହେବାର ସମ୍ଭାବନା ରହିଛି।
ଗୁରୁବାର ରାଜ୍ୟର ବିଭିନ୍ନ ସ୍ଥାନରେ ସର୍ବାଧିକ ତାପମାତ୍ରା ବୃଦ୍ଧି ପାଇଛି। ଭୁବନେଶ୍ବରରେ ସର୍ବାଧିକ ତାପମାତ୍ରା ୩୬.୨ଡିଗ୍ରୀ ରେକର୍ଡ ହୋଇଥିବା ବେଳେ କଟକ ୩୫ଡିଗ୍ରୀ, ଚାନ୍ଦବାଲି ୩୫.୨ଡିଗ୍ରୀ, ଅନୁଗୋଳ ୩୫.୯ଡିଗ୍ରୀ, ପାରଳାଖେମୁଣ୍ଡି ଓ ବୌଦ୍ଧ ୩୫ଡିଗ୍ରୀ, ଭଦ୍ରକ ୩୫.୮ଡିଗ୍ରୀ ରେକର୍ଡ ହୋଇଛି।
