ଲଡୁଗାଁ: କଳାହାଣ୍ଡି ଜିଲ୍ଲା କୋକସରା ବ୍ଲକ ମହିମା ପଞ୍ଚାୟତ ନିର୍ବାହୀ ଅଧିକାରୀଙ୍କ ଦେଖା ଦେଉନଥିବା ଓ କୌଣସି କାର୍ୟ୍ୟ ନିର୍ବାହ କରୁନଥିବା ନେଇ ବାରମ୍ବାର ମହିମା ପଞ୍ଚାୟତବାସୀ ସରପଞ୍ଚଙ୍କୁ ଅଭିଯୋଗ କରି ଆସୁଥିଲେ। ଏ ନେଇ ଅନେକ ଥର ମହିମା ସରପଞ୍ଚ ଓ ସମିତି ସଭ୍ୟ ମଧ୍ୟ ବ୍ଲକ ପ୍ରଶାସନକୁ ଜଣାଇ ଆସୁଥିଲେ ହେଲେ ପ୍ରଶାସନ ପକ୍ଷରୁ କୌଣସି କାର୍ୟ୍ୟାନୁଷ୍ଠାନ ନିଆଯାଇନାହିଁ। ସୋମବାର କୋକସରା ବ୍ଲକରେ ଜିଲ୍ଲାପାଳଙ୍କ ଅଭିଯୋଗ ଶୁଣାଣି କାର୍ୟ୍ୟକ୍ରମରେ କାର୍ୟ୍ୟନିର୍ବାହୀ ଅଧିକାରୀଙ୍କ ବିରୁଦ୍ଧରେ କାର୍ୟ୍ୟାନୁଷ୍ଠାନ ଓ ପଞ୍ଚାୟତ ପାଇଁ ନୂତନ ଅଧିକାରୀ ଯୋଗାଇ ଦେବା ପାଇଁ ମହିମା ସରପଞ୍ଚ ଇଶରାମ କୋଲଥିଆ ଓ ସମିତି ସଭ୍ୟ ଘନଶ୍ୟାମ ନାଏକ ଅଭିଯୋଗ କରିଛନ୍ତି। ସୂଚନାନୁଯାୟୀ କୋକସରା ବ୍ଲକର ମହିମା ପଞ୍ଚାୟତରେ ଗତ ବର୍ଷ ଅକ୍ଟୋବର ମାସରେ କାର୍ୟ୍ୟ ନିର୍ବାହୀ ଅଧିକାରୀ ରୁପେ ମାନଗୋବିନ୍ଦ ଦଳେଇ ଯୋଗ ଦେଇଥିଲେ। ଯୋଗଦେବା ପରେ ବାବୁଙ୍କର ଆଉ ପଞ୍ଚାୟତରେ ଦେଖା ମିଳିଲା ନାହିଁ। ଯାହା ଫଳରେ ଆଜକୁ ପ୍ରାୟ ୪ ମାସରୁ ଅଧିକ ହେବ ବିନା ଛୁଟିରେ ଅଧିକାରୀ ଅନୁପସ୍ଥିତ ରହିଲେ। ନିଜ ଦାୟିତ୍ଵ ସମ୍ପାଦନ ନ କରି କିଭଳି ସରକାର ଦେଉଥିବା ଦରମା ଘରେ ବସି କେମିତି ଅଏସ୍ କରୁଛନ୍ତି ତାହା ଏବେ ବୁଦ୍ଧିଜିବୀ ମହଲରେ ଆଲୋଚନାର କେନ୍ଦ୍ରବିନ୍ଦୁ ପାଲଟିଛି। ଏବେ ପଞ୍ଚାୟତର ଉନ୍ନୟନ ମୂଳକ କାର୍ୟ୍ୟ ଠପ୍ ହୋଇଛି। ଲୋକେ ହଇରାଣ ହେଉଛନ୍ତି। ଏହାକୁ ନେଇ ଜିଲ୍ଲାପାଳଙ୍କୁ ଅଭିଯୋଗ ପରେ ଜିଲ୍ଲାପାଳ ପି.ଅନ୍ୱେସା ରେଡ୍ଡି କୋକସରା ବିଡ଼ିଓ ଦେବବ୍ରତ କରାଟିଙ୍କୁ ତଦନ୍ତ କରିବା ସହ ପିଇଓଙ୍କ ବିରୋଧରେ କାର୍ୟ୍ୟାନୁଷ୍ଠାନ ଗ୍ରହଣ କରାଯିବା ନେଇ ସୂଚନା ମିଳିଛି।
Popular Categories
Previous article
Next article