ଗୁଣପୁର: ରାୟଗଡା ଜିଲା ଗୁଣୁପୁର ମୁଖ୍ୟରାସ୍ତା ଉପରେ ପ୍ରାୟ ସବୁବେଳେ ଗାଈ ଗୋରୁଙ୍କ ଚଳ ପ୍ରଚଳ କାରଣରୁ ପ୍ରତିଦିନ ଦୁର୍ଘଟଣା ଘଟିବାରେ ଲାଗିଛି। ପିଲା ଠାରୁ ବୁଢ଼ା ପର୍ଯନ୍ତ ସମସ୍ତେ ଏହାର ଶୀକାର ହେଉଛନ୍ତି। ମାଲିକ ମାନେ କ୍ଷୀର ବ୍ୟବହାର କରିସାରିବା ପରେ ନିଜ ଗୁହାଳରେ ବାନ୍ଧି ନ ରଖି ଛାଡ଼ିଦେବା କାରଣରୁ ଏହି ସମସ୍ୟା ଦେଖାଦେଇଛି। ଶହ ଶହ ଗାଈ ଗୋରୁ ମୁଖ୍ୟ ରାସ୍ତା ଉପରେ ପଡି ରହିବା କାରଣରୁ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ବାରମ୍ବାର ଅଭିଯୋଗ ପରେ ଵି ମାଲିକ ମାନଙ୍କର ବେଖାତିର ମନୋଭାବ ସାଧାରଣରେ ତୀବ୍ର ଅସନ୍ତୋଷ ସୃଷ୍ଟି କରୁଛି।
ରାସ୍ତା ଖରାପ ସାଙ୍ଗକୁ ଗାଈ ଗୋରୁ ମାନଙ୍କ ଦୌରାତ୍ମ୍ୟ ବୃଦ୍ଧି ପାଇବା କାରଣରୁ ଦୁର୍ଘଟଣା ଘଟିବା ସ୍ୱାଭାବିକ ହୋଇଯାଇଛି। ବର୍ତ୍ତମାନ ରଥଯାତ୍ରା ସମୟରେ ମଧ୍ୟ ମନ୍ଦିର ଯିବା ରାସ୍ତାରେ ଗାଈଗୋରୁ ମାନେ ଶୋଇ ରହିବା କାରଣରୁ ଯାତାୟତରେ ନାହିଁ ନଥିବା ସମସ୍ୟା ସୃଷ୍ଟି ହୋଇଛି। ତେବେ ପଶୁପକ୍ଷୀଙ୍କ ପ୍ରତି ମଣିଷର ଏଭଳି ଅମାନବିକତା ଓ ପୌର ପରିଷଦର ଉଦାସୀନତା ମନୋଭାବକୁ ସାଧାରଣରେ ନାପସନ୍ଦ କରାଯାଇଛି। ଯଥାଶୀଘ୍ର ସ୍ଥାନୀୟ ପୌରପାଳିକା କର୍ତ୍ତୃପକ୍ଷ ଏଥିପ୍ରତି ଉପଯୁକ୍ତ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବି ହୋଇଛି।
