ଭୁବନେଶ୍ୱର: ରାଜ୍ୟବାସୀଙ୍କୁ କରୋନା ମହାମାରୀ ସଙ୍କଟରୁ ବଞ୍ଚାଇବା ପାଇଁ ରାଜ୍ୟ ସରକାରଙ୍କ ପକ୍ଷରୁ ଗତ ୧୦ତାରିଖ କ୍ୟାବିନେଟ ବୈଠକରେ ବିଶ୍ୱବଜାରରୁ ଟିକା ସଂଗ୍ରହ ଲାଗି ନିଷ୍ପତ୍ତି ହୋଇଥିଲା। ଏହି କ୍ରମରେ ଶୁକ୍ରବାର ସ୍ୱାସ୍ଥ୍ୟ ବିଭାଗ ପକ୍ଷରୁ ବିଧିବଦ୍ଧ ୩ କୋଟି ୮୦ ଲକ୍ଷ ଟିକା କିଣିବା ପାଇଁ ଇ-ଟେଣ୍ଡର (ଲିଖିତ ପ୍ରସ୍ତାବ) ପ୍ରକ୍ରିୟା ଆରମ୍ଭ ହୋଇଛି। ରାଜ୍ୟ ଔଷଧ ନିଗମ ପରିଚାଳନା ନିର୍ଦେଶକଙ୍କ ପକ୍ଷରୁ ୨୯ପୃଷ୍ଠା ସମ୍ବଳିତ ଏହି ଇ-ଟେଣ୍ଡର ପ୍ରକ୍ରିୟାରେ କେତେକ ସର୍ତ୍ତ ରଖାଯାଇଛି।
ଆଗ୍ରହୀ ସଂସ୍ଥା ଚଳିତମାସ ୧୯ରେ ପ୍ରାକ୍ ଟେଣ୍ଡର ପ୍ରକ୍ରିୟାରେ ସାମିଲ ହେବେ। ୨୦ ରୁ ୨୮ ତାରିଖ ମଧ୍ୟରେ ସମ୍ପୂର୍ଣ୍ଣ ଟେଣ୍ଡର କାଗଜପତ୍ର ଅନଲାଇନ ଜରିଆରେ ପୈଠ କରିବେ। ଏ ସମ୍ପର୍କରେ ଅଧିକ ତଥ୍ୟ ହାସଲ ପାଇଁ କମ୍ପାନୀଗୁଡ଼ିକ ରାଜ୍ୟ ଔଷଧ ନିଗମର ଦୂରଭାଷ ନମ୍ବରରେ ଯୋଗାଯୋଗ କରିପାରିବେ। ୨୮ରେ ଟେଣ୍ଡର କାଗଜ ଖୋଲାଯିବ ବୋଲି ପରିଚାଳନା ନିର୍ଦେଶିକା ଯାମିନୀ ଷଡ଼ଙ୍ଗୀ ସୂଚନା ଦେଇଛନ୍ତି। ଟେଣ୍ଡର ସର୍ତ୍ତ ଅନୁଯାୟୀ ସର୍ବନିମ୍ନ ମୂଲ୍ୟ ଦେଇଥିବା ସଂସ୍ଥାକୁ ୫୦ ପ୍ରତିଶତ ଟିକା ଯୋଗାଇବାକୁ ଅନୁମତି ମିଳିବ। ସେହିପରି ଅନ୍ୟ ୫୦ ପ୍ରତିଶତ ଟିକା ଯୋଗାଇବାକୁ କିପରି ଅବଶିଷ୍ଟ ସଂସ୍ଥାଗୁଡ଼ିକୁ ଦିଆଯିବ ସେ ନେଇ ଔଷଧ ନିଗମ ନିଷ୍ପତ୍ତି ନେବ।
