ବରପାଲି: ଶିକ୍ଷକମାନଙ୍କୁ କରୋନା ଯୋଦ୍ଧା ଭାବରେ ସରକାର ଘୋଷଣା କରିବାକୁ ବରପାଲି ବ୍ଲକ ପ୍ରାଥମିକ ଶିକ୍ଷକ ସଂଘ ପକ୍ଷରୁ ବିଜେପୁର ବିଧାୟିକ ରିତା ସାହୁଙ୍କ ନିକଟରେ ଦାବି କରାଯାଇଛି। ସଂଘ କର୍ମକର୍ତ୍ତାମାନେ ବିଧାୟିକାଙ୍କୁ ଭେଟି ଏହି ଦାବି ରଖିଥିବାବେଳେ ଶ୍ରୀମତୀ ସାହୁ ସେମାନଙ୍କ ଦାବି ସମ୍ପର୍କରେ ଜିଲାପାଳ ଓ ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିବାକୁ ପ୍ରତିଶ୍ରୁତି ଦେଇଥିଲେ। ସଂଘ ପକ୍ଷରୁ କୁହାଯାଇଛି ଯେ ସଂପ୍ରତି ମହାମାରୀ ସମୟରେ ଶିକ୍ଷକମାନଙ୍କୁ ଘରକୁ ଘର ବୁଲି ବିବରଣୀ ସଂଗ୍ରହ, ସଚେତନତା ବାର୍ତ୍ତା ପ୍ରସାର, ରେଳ ଷ୍ଟେସନରେ ଯାତ୍ରୀମାନଙ୍କ ସ୍ୱାସ୍ଥ୍ୟ ସମ୍ପର୍କିତ ରିପୋର୍ଟ ପ୍ରସ୍ତୁତି, ସ୍ୱାସ୍ଥ୍ୟକେନ୍ଦ୍ର ସହାୟକ ମୁଖ୍ୟ ଟେବୁଲରେ ବିବରଣୀ ପ୍ରସ୍ତୁତି ଭଳି ଗୁରୁ ଦାୟିତ୍ୱ ଦିଆଯାଇଛି। କିନ୍ତୁ ସେମାନଙ୍କୁ ନିଜ ସୁରକ୍ଷା ପାଇଁ ପିପିଇ କିଟ୍, ଗ୍ଲୋଭ୍ସ, ତୁଣ୍ଡି, ସାନିଟାଇଜର ଆଦି ଜରୁରୀ ସୁରକ୍ଷା ସାମଗ୍ରୀ ଯୋଗାଇ ଦିଆଯାଉନାହିଁ। ଏହାଦ୍ୱାରା ଶିକ୍ଷକମାନେ ନିଜେ ଓ ସେମାନଙ୍କ ପରିବାରବର୍ଗ ଆତଙ୍କିତ ଅବସ୍ଥାରେ ରହୁଛନ୍ତି। ସରକାର ବିଭିନ୍ନ ବିଭାଗର କର୍ମଚାରୀଙ୍କୁ କରୋନା ଯୋଦ୍ଧା ଭାବରେ ଘୋଷଣା କରିଥିବାବେଳେ ଶିକ୍ଷକମାନଙ୍କୁ ସେଥିରେ ସାମିଲ କରିବାକୁ ସଂଘ ସଭାପତି ସରୋଜ ରାଉତ, ସମ୍ପାଦକ ସୋହନ ପଧାନ, ନିମେଇଁ ଦାଶ, ମର୍କଧ୍ୱଜ ଭୋଇ, ଶେକର ବାରିକ, ରାଜେନ୍ଦ୍ର ପୁଝାରୀ ଏବଂ ଅନ୍ୟମାନେ ଦାବି ଜଣାଇଛନ୍ତି।
Comments are closed.