ଦୁଇ ବର୍ଷ ମଧ୍ୟରେ ଦେଶର ରାଜପଥରୁ ହଟିବ ସବୁ ଟୋଲ, ଜିପିଏସ୍ ଟ୍ରାକ କରି ଆଦାୟ ହେବ ଟୋଲ ଟିକସ

ନୂଆଦିଲ୍ଲୀ:  ଜାତୀୟ ରାଜପଥରୁ ହଟିବ ଟୋଲ ଗେଟ୍ । ଦୁଇ ବର୍ଷ ମଧ୍ୟରେ ଦେଶର ସମସ୍ତ ଟୋଲଗେଟକୁ ହଟାଇ ଦିଆଯିବ । ମାତ୍ର ଯାତାୟତ ପାଇଁ ପୂର୍ବ ପରି ଟିକସ ଦେବା ନିମନ୍ତେ ପଡ଼ିବ । ଏଥିପାଇଁ ଗ୍ଲୋବାଲ ପୋଜିସନିଂ ସିଷ୍ଟମ (ଜିପିଏସ) ବ୍ୟବସ୍ଥା କରାଯିବ । କେନ୍ଦ୍ର ସରକାର ଗୁରୁବାର ଏ ସଂକ୍ରାନ୍ତରେ ସୂଚନା ଦେଇଛନ୍ତି ।

କେନ୍ଦ୍ର ମନ୍ତ୍ରୀ ନିତିନ ଗଡକରୀ କହିଛନ୍ତି ଯେ ଆସନ୍ତା ଦୁଇ ବର୍ଷ ମଧ୍ୟରେ ଭାରତକୁ ଟୋଲ ଫାଟକମୁକ୍ତ କରାଯିବ । ଜିପିଏସ ସଂଯୋଗ ପରେ ଗାଡ଼ିଗୁଡ଼ିକରୁ ଟୋଲ ଟିକସ ସଂଯୋଗ ହୋଇଥିବା ବ୍ୟାଙ୍କ ଆକାଉଣ୍ଟରୁ ଆପେଆପେ କଟିଯିବ । ଆସୋଚାମ ଫାଉଣ୍ଡେସନ ସପ୍ତାହ କାର୍ଯ୍ୟକ୍ରମରେ ଯୋଗ ଦେଇ ନିତିନ ଗଡକରୀ କହିଛନ୍ତି ଏଥିଲାଗି ରୁଷ ସରକାରଙ୍କ ସହାୟତା ନିଆଯିବ । ଖୁବ୍ ଶୀଘ୍ର ଏଥିନେଇ ପଦକ୍ଷେପ ଗ୍ରହଣ କରାଯିବ ବୋଲି ଗଡ଼କରୀ କହିଛନ୍ତି । ଏହା ସହ ସବୁ ନୂଆ ଗାଡ଼ି ସହ ପୁରୁଣା ଗାଡ଼ି ଓ ବାଣିଜ୍ୟିକ ଯାନଗୁଡ଼ିକରେ ଜିପିଏସ୍ ଲଗାଯିବ ।ଜିପିଏସ୍ ଟେକ୍ନୋଲୋଜି ବ୍ୟବହାର କରିବା ପରେ, ଜାତୀୟ ରାଜପଥ ପ୍ରାଧିକରଣ (NHAI) ର ଟୋଲ୍ ରାଜସ୍ୱ ପାଞ୍ଚ ବର୍ଷରେ ୧.୩୪ ଟ୍ରିଲିୟନକୁ ବୃଦ୍ଧି ପାଇପାରେବୋଲି ଆକଳନ କରାଯାଇଛି ।

ମନ୍ତ୍ରୀଙ୍କ ସୂଚନା ଅନୁସାରେ  ଗତକାଲି  ସଡକ ପରିବହନ ଏବଂ ରାଜପଥ ତଥା ଚେୟାରମ୍ୟାନ୍ NHAI ଙ୍କ ଉପସ୍ଥିତିରେ ଟୋଲ୍ ସଂଗ୍ରହ ପାଇଁ ଜିପିଏସ୍ ଟେକ୍ନୋଲୋଜି ବ୍ୟବହାର କରି ଏକ ଉପସ୍ଥାପନା କରାଯାଇଥିଲା। ଆସନ୍ତା ପାଞ୍ଚ ବର୍ଷ ମଧ୍ୟରେ ଆମର ଟୋଲ୍ ଆୟ୧୩୪୦୦ କୋଟି ଟଙ୍କା ହେବ ବୋଲି ଆମେ ଆଶା କରୁଛୁ। ସୂଚନାଯୋଗ୍ୟ ଯେ  ଗତ ଏକ ବର୍ଷ ମଧ୍ୟରେ କେନ୍ଦ୍ର ସରକାର ଦେଶର ସମସ୍ତ ଟୋଲ ପ୍ଲାଜାରେ FASTAG ବାଧ୍ୟତାମୂଳକ କରିଛନ୍ତି। ଫାଷ୍ଟ ଟ୍ୟାଗ ବ୍ୟବହାର ପରେ କିଛି ପରିମାଣରେ ଇନ୍ଧନ ସଞ୍ଚୟ ହୋଇ ପାରିଛି ଏବଂ ପ୍ରଦୂଷଣ ହ୍ରାସ ପାଇଛି ବୋଲି ସୂଚନା ମିଳିଛି ।