ନୀଳଗିରି: ସମଗ୍ର ବସୁଧା ହେଉଛି ଏକ କୁଟୁମ୍ବ । ଆମ ଭାରତୀୟ ଭାବଧାରାକୁ ନେଇ ବ୍ୟକ୍ତିଙ୍କ ମଧ୍ୟରେ ଭାଇଚାରା ସୃଷ୍ଟି ହୋଇଥାଏ । ଆମେ ଓଡ଼ିଆ ବୋଲି ସେତେବେଳେ ଗର୍ବ କରିବା ଉଚିତ; ଯେତେବେଳେ ଆମେ ଆମ ମାତୃଭାଷାକୁ ସମ୍ମାନ ଓ ସୁରକ୍ଷା ଯୋଗାଇ ଦେଇପାରିବା । ବ୍ୟକ୍ତିଙ୍କ ବିଚାରରୁ ଭାଷା ବିକଶିତ ହୋଇଥାଏ ଏବଂ ବ୍ୟକ୍ତିତ୍ୱରୁ ହିଁ ଭାଷା ପ୍ରସ୍ଫୁଟିତ ହୁଏ ବୋଲି ବାଲେଶ୍ୱର ଜିଲା ଅଧୀନ ନୀଳଗିରି ମହିଳା ମହାବିଦ୍ୟାଳୟ ପ୍ରାଙ୍ଗଣରେ ବ୍ୟାସକବି ସାହିତ୍ୟ ସଂସଦ ପକ୍ଷରୁ ଆୟୋଜିତ ଏକ ସମ୍ବର୍ଦ୍ଧନା ଉତ୍ସବ ଓ କବିତା ଆସରରେ ଯୋଗ ଦେଇଥିବା ଅତିଥିମାନେ ମତବ୍ୟକ୍ତ କରିଥିଲେ । ସଂସଦ ସଭାପତି ବିପିନ ବିହାରୀ ବାରିକଙ୍କ ପୌରୋହିତ୍ୟରେ ଆୟୋଜିତ ଏହି କାର୍ଯ୍ୟକ୍ରମରେ ସଂସଦର ମୁଖ୍ୟ ସମ୍ପାଦକ ଯଚିନ୍ଦ୍ର ସ୍ୱାଇଁ ଅତିଥି ପରିଚୟ ଦେଇଥିଲେ । ମୁଖ୍ୟଅତିଥିଭାବେ ଫକୀର ମୋହନ ବିଶ୍ୱବିଦ୍ୟାଳୟର ଓଡ଼ିଆ ଭାଷା ସାହିତ୍ୟ ବିଭାଗ ମୁଖ୍ୟ ପ୍ରଫେସର ମନୀନ୍ଦ୍ର ମେହେର ଯୋଗଦେଇ ଓଡ଼ିଆ ଭାଷାର ସୁରକ୍ଷା ପାଇଁ ପ୍ରତିଟି ଓଡ଼ିଆ ସ୍ୱର ଉତ୍ତୋଳନ କରିବା ଉଚିତ ବୋଲି କହିଥିଲେ । ମୁଖ୍ୟବକ୍ତା ଫକୀର ମୋହନ ସ୍ୱୟଂଶାସିତ ମହାବିଦ୍ୟାଳୟର ଓଡ଼ିଆ ଅଧ୍ୟାପକ ସନ୍ତୋଷ ନାୟକ, ସମ୍ମାନିତ ଅତିଥିଭାବେ ବାଲିଗୋହିରୀସ୍ଥିତ ରତ୍ନାକର ଟାଉନ ହାଇସ୍କୁଲର ପ୍ରଧାନ ଶିକ୍ଷକ ବିନୋଦବିହାରୀ ପଣ୍ଡା, ନୀଳଗିରି ମହିଳା ମହାବିଦ୍ୟାଳୟ ଅଧ୍ୟାପକ ପ୍ରଦୀପ୍ତ ମିଶ୍ର ପ୍ରମୁଖ ମଞ୍ଚାସୀନ ହୋଇ ସ୍ୱାଭିମାନୀ ଓଡ଼ିଆ ଓ ଏମାନଙ୍କ ଭାଷା ସୁରକ୍ଷା ସମ୍ବନ୍ଧରେ ବକ୍ତବ୍ୟ ରଖିଥିଲେ । ସଂସଦର ଯୁଗ୍ମସମ୍ପାଦିକା ସଙ୍ଗୀତା ବାରିକ ମଞ୍ଚ ପରିଚାଳନା କରିଥିବା ବେଳେ ଶିକ୍ଷକ ଶିବସୁନ୍ଦର ସାହୁ ଧନ୍ୟବାଦ ଦେଇଥିଲେ । ଏହି ଅବସରରେ ସାମ୍ବାଦିକ ସୁକାନ୍ତ ଦାସଙ୍କ ସମେତ ଦୁର୍ଯ୍ୟୋଧନ ବାରିକ, ସରସ୍ୱତୀ ବାରିକ, ପ୍ରଣତି ମହାପାତ୍ର, ନିରଞ୍ଜନ ତ୍ରିପାଠୀ, ଗୋପବନ୍ଧୁ ମିଶ୍ର, ସୁକାନ୍ତ ବେହେରା, ନୃସିଂହ ଚରଣ ପଣ୍ଡା ପ୍ରମୁଖଙ୍କୁ ସମ୍ବର୍ଦ୍ଧନା ଦିଆଯାଇଛି । ଶେଷରେ ୩୦ଜଣ ସାରସ୍ୱତ ସାଧକ ସ୍ୱରଚିତ କବିତା ପାଠ କରିଥିଲେ ।
Popular Categories
Previous article
Next article