ଟିକଟ ସସ୍‌‌ପେନ୍ସ ପାଇଁ ସବୁ ସାଇଲେଣ୍ଟ

ନୀଳଗିରି: ବାଲେଶ୍ୱର ଜିଲାର ନୀଳଗିରି ନିର୍ବାଚନ ମଣ୍ଡଳୀରେ ସମ୍ପ୍ରତି ରାଜନୈତିକ ବାତାବରଣ ଉଷ୍ଣ ରହିଥିବା ଦେଖିବାକୁ ମିଳିଛି । ଗଛ ଲଗାଇଥିବା ଲୋକକୁ ଫଳ ମିଳିବ ନା ଫଳକୁ ଦେଖୁଥିବା ଲୋକଙ୍କୁ ମିଳିବ, ସେନେଇ ବଢ଼ିଛି ସସ୍‌‌ପେନ୍ସ । ୨୦୧୯ରେ ହଠାତ ବିଜେଡିରୁ ବିଜେପିକୁ ଡିଆଁ ମାରି ପଳାଇଥିବା ନୀଳଗିରି ବିଧାୟକ ସୁକାନ୍ତ ନାୟକ କିଛିଦିନ ପୂର୍ବରୁ ପୁଣିଥରେ ଦଳବଦଳ କରି ବିଜେଡିକୁ ଫେରି ଆସିଛନ୍ତି।

ନୀଳଗିରି ଟିକଟ ପାଇବା ଲକ୍ଷ୍ୟରେ ସେ ଶଙ୍ଖଭବନରେ ଯାଇ ବିଜେଡିରେ ମିଶିଛନ୍ତି । ହେଲେ ସୁକାନ୍ତ ବିଜେପିକୁ ଡେଇଁବା ପରେ ଦୀର୍ଘ ୫ବର୍ଷ ଧରି ଜିଲା ବିଜେଡିର ବରିଷ୍ଠ ଉପସଭାପତି ସନ୍ତୋଷ ଖଟୁଆ ନୀଳଗିରି ନିର୍ବାଚନମଣ୍ଡଳୀରେ ଦଳକୁ ସଜାଡ଼ି ରଖିଛନ୍ତି । ତାଙ୍କ ନେତୃତ୍ୱରେ ନୀଳଗିରି, ଔପଦା ବ୍ଲକ ଓ ଏନଏସିର ଅଧ୍ୟକ୍ଷା, ଉପାଧ୍ୟକ୍ଷ ପଦ ସହ ୬ଟି ଜିଲା ପରିଷଦ ସଭ୍ୟଙ୍କ ମଧ୍ୟରୁ ୫ଟି କରାୟତ କରିବା, ପୁଣି ସମବାୟ ନିର୍ବାଚନଠାରୁ ଆରମ୍ଭ କରି ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପର୍ୟ୍ୟନ୍ତ ଗୋଟି ଚାଳନା କରି ସଂଖ୍ୟା ଗରିଷ୍ଠତା ହାସଲ କରାଯାଇଛି।

ଏଭଳି ପରିସ୍ଥିତିରେ ସୁକାନ୍ତଙ୍କୁ ଟିକଟ ମିଳିବା ଚର୍ଚ୍ଚା ଉଠିବା ପରେ ଅସନ୍ତୋଷ ପ୍ରକାଶ କରିଛନ୍ତି ନୀଳଗିରିର ବିଜେଡି କର୍ମୀ । ଏନେଇ ସନ୍ତୋଷ ଓ ସୁକାନ୍ତଙ୍କୁ ଭୁବନେଶ୍ୱର ଡାକରା ହୋଇଛି । ଆଜି ଉଭୟଙ୍କ ମଧ୍ୟରେ ଆଲୋଚନା କରାଯାଇ ନିଷ୍କର୍ସ ବାହାରିବ । ସେପଟେ ନୀଳଗିରି ବିଜେଡିର ସମସ୍ତ ନିର୍ବାଚିତ ପ୍ରତିନିଧିମାନେ ସ୍ୱର ଉଠାଇଲେଣି ସୁକାନ୍ତଙ୍କୁ ଟିକଟ ମିଳିଲେ, ସେମାନେ ସମର୍ଥନ କରିବେନି। ଏଭଳି ପରିସ୍ଥିତିରେ ଦଳୀୟ ସାଂଗଠନିକ ଦୃଷ୍ଟିରୁ ନୀଳଗିରି ଆସନଟି ସନ୍ତୋଷଙ୍କୁ ଏବଂ ସୁକାନ୍ତ ଯେହେତୁ ୨ଥର ବିଧାୟକ ରହିଛନ୍ତି । ତାଙ୍କୁ ବାଲେଶ୍ୱର ଲୋକସଭା ସଂସଦୀୟ କ୍ଷେତ୍ର ପାଇଁ ଟିକଟ ଦିଆଗଲେ ହୁଏତ ୨ଜଣଙ୍କ ଭିତରେ ଲାଗି ରହିଥିବା ବିବାଦର ଅନ୍ତଃ ଘଟି ବିଜେଡି ଆହୁରି ଅଧିକ ସୁଦୃଢ଼ ହୋଇ ପାରିବ ବୋଲି ରାଜନୈତିକ ବିଶ୍ଳେଷକମାନେ ମତ ଦେଇଛନ୍ତି।