ନୀଳଗିରି: ନୀଳଗିରି ବ୍ଲକ ଅଧୀନ ନରଣପୁର ହାଇସ୍କୁଲର କଳା ଶିକ୍ଷକ ହରେନ୍ଦ୍ର ରାଉତଙ୍କୁ ପରିଚାଳନା କମିଟିର ବିନା ଅନୁମତିରେ ୨୦୧୬ ମସିହା ଜୁଲାଇ ୨୨ ତାରିଖରୁ ବାଲେଶ୍ୱର ଜିଲା ଶିକ୍ଷାଧିକାରୀଙ୍କ କାର୍ୟ୍ୟାଳୟର ମଧ୍ୟାହ୍ନ ଭୋଜନ ବିଭାଗରେ ଅବସ୍ଥାପିତ କରାଯାଇଥିଲା । ସମ୍ପୃକ୍ତ ଶିକ୍ଷକ ଅଦ୍ୟାବଧି ନରଣପୁର ହାଇସ୍କୁଲରୁ ଦରମା ଉଠାଉଥିବା ବେଳେ ପ୍ରକୃତ ପକ୍ଷେ ତାଙ୍କର କର୍ମକ୍ଷେତ୍ର ବାଲେଶ୍ୱର ଜିଲା ଶିକ୍ଷାଧିକାରୀଙ୍କ କାର୍ୟ୍ୟାଳୟ ରହିଛି । ଶିକ୍ଷକ ଜଣକ ଦୀର୍ଘ ୭ବର୍ଷ ହେବ ଡେପୁଟେସନରେ ଯାଇ, ଏଠାକୁ ଫେରିନାହାଁନ୍ତି।
ଏଠାରେ ଶିକ୍ଷକ ମରୁଡ଼ି ଯୋଗୁ ପିଲାଙ୍କ ପାଠପଢ଼ାରେ ବ୍ୟାଘାତ ହେବା ନେଇ ଅଞ୍ଚଳବାସୀ, ଅଭିଭାବକ ଓ ବିଦ୍ୟାର୍ଥୀଙ୍କ ତରଫରୁ ପୂର୍ବରୁ ଚେତାବନୀ ଦିଆଯାଇଥିଲା । ତୁରନ୍ତ ଶିକ୍ଷକ ଶ୍ରୀ ରାଉତଙ୍କୁ ନରଣପୁରକୁ ଫେରାଇ ଆଣିବା ଦାବିରେ ବିଦ୍ୟାର୍ଥୀମାନେ ଆଜି ସ୍କୁଲ ସମ୍ମୁଖରେ ଧାରଣାରେ ବସିଥିଲେ । ଖବରପାଇ ନୀଳଗିରି ବିଧାୟକ ସୁକାନ୍ତ ନାୟକ, ବିଇଓ ସ୍ନିଗ୍ଧା ପଣ୍ଡା ପ୍ରମୁଖ ଧାରଣା ସ୍ଥଳରେ ପହଞ୍ଚି ପିଲାଙ୍କ ସହ ଆଲୋଚନା କରିଥିଲେ । ଆସନ୍ତା ୧୦ଦିନ ଭିତରେ ଶିକ୍ଷକ ଶ୍ରୀ ରାଉତଙ୍କୁ ଏଠାକୁ ଫେରାଇ ଆଣିବା ଏବଂ ସେତିକ ଦିନ ଯାଏଁ ଜଣେ ଯୋଗ୍ୟ ଶିକ୍ଷକଙ୍କୁ ଏଠାରେ ଅବସ୍ଥାପିତ କରାଯିବ ବୋଲି ବିଇଓ ଶ୍ରୀମତୀ ପଣ୍ଡା ପ୍ରତିଶ୍ରୁତି ଦେବା ପରେ ବିଦ୍ୟାର୍ଥୀମାନେ ଧାରଣାରୁ ଓହରି ଥିଲେ ।
Comments are closed.