ସମାଜ ଡିଜିଟାଲ ଡେସ୍କ: କଟକର ଜଣେ ମହିଳା ଡାକ୍ତରଙ୍କୁ ବ୍ଲାକମେଲ କରି ଲକ୍ଷାଧିକ ଟଙ୍କା ହଡ଼ପ କରିଥିବା ନାଇଜେରିଆର ଜଣେ ନାଗରିକକୁ ଗିରଫ କରିଛି କମିଶନରେଟ ପୁଲିସ। ଦିଲ୍ଲୀର ଉତ୍ତମନଗରରୁ ଅଭିଯୁକ୍ତ ଯୁବକକୁ ଗିରଫ କରାଯାଇଛି।
ସୂଚନା ଅନୁସାରେ, କଟକ ଅଞ୍ଚଳର ପୀଡ଼ିତା ମହିଳା ଡାକ୍ତର ଜଣଙ୍କ ସହିତ ଅଭିଯୁକ୍ତ ନାଇଜେରିଆ ଯୁବକର ସମ୍ପର୍କ ଥିଲା। ଡାକ୍ତରଙ୍କ ଅଶ୍ଳୀଳ ଫଟୋ ଏବଂ ଭିଡିଓ ଭାଇରାଲ କରିବାର ଧମକ ଦେଇ ସେ ତାଙ୍କଠାରୁ ଲକ୍ଷାଧିକ ଟଙ୍କା ହଡ଼ପ କରିଥିଲା। ପରବର୍ତ୍ତୀ ସମୟରେ ଡାକ୍ତର ଜଣକ ଆଉ ଟଙ୍କା ନ ଦେବାରୁ ଅଭିଯୁକ୍ତ ତାଙ୍କ ଅଶ୍ଳୀଳ ଫଟୋ ଏବଂ ଭିଡିଓ ସବୁ ସାମାଜିକ ଗଣମାଧ୍ୟମରେ ଭାଇରାଲ କରିଦେଇଥିଲା। ଯାହାଫଳରେ ମହିଳା ଡାକ୍ତର ଜଣକ ଲୋକ ଲଜ୍ଜା ଯୋଗୁ ଆତ୍ମହତ୍ୟା କରିଥିଲେ। ଏ ସମ୍ପର୍କରେ ପରିବାର ପକ୍ଷରୁ ଥାନାରେ ଅଭିଯୋଗ କରାଯାଇଥିଲା। ପୁଲିସ ଘଟଣାର ତଦନ୍ତ କରି ଅଭିଯୁକ୍ତକୁ ଦିଲ୍ଲୀରୁ ଗିରଫ କରିଛି। ତା’ ନିକଟରୁ ଲାପଟପ, ୫ଟି ମୋବାଇଲ ଫୋନ, ବିଦେଶୀ ସିମ୍ ଆଦି ଜବତ କରାଯାଇଛି। ଅଭିଯୁକ୍ତ ଜଣକ ଏକାଧିକ ମହିଳାଙ୍କ ସହିତ ସମ୍ପର୍କ ରଖି ବ୍ଲାକମେଲ କରି ଟଙ୍କା ହଡ଼ପ କରୁଥିବା ପୁଲିସ ସନ୍ଦେହ କରି ଅଧିକ ଖୋଳତାଡ଼ କରୁଛି। ଅଭିଯୁକ୍ତକୁ ରିମାଣ୍ଡରେ ଅଣାଯାଇ ପଚରାଉଚରା କରାଯିବ ବୋଲି କଟକ ଡିସିପି ଗଣମାଧ୍ୟମକୁ ସୂଚନା ଦେଇଛନ୍ତି। ଅଭିଯୁକ୍ତ ଏକାଧିକ ବ୍ୟକ୍ତିର ପରିଚୟ ଦେଇ ଲୋକଙ୍କୁ ଠକିଥିବା ଜଣାପଡ଼ିଛି। ଏପରି କି ନ୍ୟୁଜିଲାଣ୍ଡରୁ ମଧ୍ୟ ତା’ ଆକାଉଣ୍ଟକୁ ଟଙ୍କା ଆସିଥିବା ତଦନ୍ତରୁ ଜଣାଯାଇଛି।
Comments are closed.