ଆଠଗଡ଼: ତିଗିରିଆ ଅଞ୍ଚଳରୁ ଶୁକ୍ରବାର ଭୋର ସମୟରେ ଏକ ପିକଅପ ଭ୍ୟାନରେ ୯-୧୦ଟି ଗୋରୁ ଚାଲାଣ ହେଉଥିବା ବେଳେ ଜେନାପଦା – ଇଚ୍ଛାପୁର ରାସ୍ତାରେ ଥିବା ସାପୁଆ ପୋଲ ନିକଟରେ ଦ୍ରୁତଗାମୀ ଭ୍ୟାନଟି ଓଲଟି ପଡ଼ିବାରୁ ସେଥିରେ ଥିବା ୪ଟି ଗାଈ ଘଟଣାସ୍ଥଳରେ ମରିଯାଇଥିଲେ। ଆଠଗଡ଼ ପୁଲିସର ପେଟ୍ରୋଲିଂ ଗାଡିକୁ ଅନତି ଦୂରରୁ ଦେଖି ସଂପୃକ୍ତ ପିକଅପ ଭ୍ୟାନଟି ଦ୍ରୁତଗତିରେ ଯାଉଥିବା ବେଳେ ଏହି ଦୁର୍ଘଟଣା ଘଟିଥିଲା। ଦୁର୍ଘଟଣା ପରେ ପୁଲିସ ପହଞ୍ଚିବା ପୂର୍ବରୁ ପିକଅପ ଭ୍ୟାନର ଚାଳକ ଓ ଅନ୍ୟ ଜଣେ ସହଯୋଗୀ ଘଟଣାସ୍ଥଳରୁ ଚମ୍ପଟ ମାରିଥିଲେ। ଗାଡିଟି ଏକ ଚାଷ ଜମି ମଧ୍ୟକୁ ଓଲଟି ପଡ଼ିବା ଫଳରେ ୪ଟି ଗାଈ ଚାପି ହୋଇ ମୃତ୍ୟୁବରଣ କରିଥିଲେ। ପୁଲିସଠାରୁ ଖବର ପାଇ ଆଠଗଡ଼ ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ମୃତ ଗୋରୁଙ୍କୁ ଉଠାଇବାରେ ସହଯୋଗ କରିଥିଲେ। ଅନ୍ୟ ଗୋରୁଗୁଡିକ ସେଠାରୁ ପଳାଇ ଯାଇଥିଲେ। ମୃତ ଗୋରୁଙ୍କର ମାଜିଷ୍ଟ୍ରେଟଙ୍କ ଉପସ୍ଥିତିରେ ପ୍ରାଣୀ ଚିକିତ୍ସକ ବ୍ୟବଚ୍ଛେଦ କରିବା ପରେ ସାପୁଆନଦୀ ନିକଟରେ ପୋତି ଦିଆଯାଇଥିଲା। ପୁଲିସ ଘଟଣାର ତଦନ୍ତ ଚଳାଇଛନ୍ତି।
Comments are closed.