ସମ୍ବଲପୁର: ସମ୍ବଲପୁରର ଅନ୍ୟତମ ପୁରାତନ ନୃସିଂହ ଟାଉନ ହାଇସ୍କୁଲରେ ଲାଗି ରହିଥିବା ବିଭିନ୍ନ ସମସ୍ୟା ଗୁଡିକର ସମାଧାନ ପାଇଁ ଜିଲାପାଳଙ୍କ ନିକଟରେ ଏହାର ପୁରାତନ ଛାତ୍ର ସଂଘ ଦାବି କରିଛି। ଜିଲା ପ୍ରଶାସନକୁ ଶୁକ୍ରବାର ପ୍ରଦତ୍ତ ଦାବିପତ୍ର ଅନୁଯାୟୀ, ହାଇସ୍କୁଲରେ ଦୀର୍ଘ ଦିନ ହେବ ପ୍ରଧାନ ଶିକ୍ଷକ ନ ଥିବାରୁ ନାହିଁ ନ ଥିବା ଅସୁବିଧା ହେଉଛି। ଏଥି ସହ ବିଦ୍ୟାଳୟର ଶ୍ରେଣୀ କୋଠରୀ ଗୁଡିକ ପୁରାତନ ହୋଇଥିବାରୁ ଏହା ଅତ୍ୟନ୍ତ ବିପଦଶଙ୍କୁଳ ଅବସ୍ଥାରେ ରହିଛି, ବିଦ୍ୟାଳୟର ପାଚେରୀ ଭାଙ୍ଗି ଯାଇଥିବାରୁ ଅସାମାଜିକ ତତ୍ୱ ମାନେ ଅବାଧରେ ପ୍ରବେଶ କରି ଉତ୍ପାତ ହେଉଛନ୍ତି, ବିଦ୍ୟାଳୟର ନିୟମିତ ରକ୍ଷଣାବେକ୍ଷଣ କରାଯାଉ ନାହିଁ, ବିଗତ ଦିନରେ ୫ଟି ଯୋଜନାରେ ବିଦ୍ୟାଳୟରେ ଏକ ବିଜ୍ଞାନ ଲ୍ୟାବ ଆରମ୍ଭ କରାଯାଇଥିବା ବେଳେ କିନ୍ତୁ ବିଦ୍ୟାଳୟରେ ବିଜ୍ଞାନ ଶିକ୍ଷକ ନାହାନ୍ତି, ଖେଳକୁଦର କୌଣସି ଉନ୍ନତିକରଣର କାର୍ଯ୍ୟ କରାଯାଉ ନାହିଁ, ସୁରକ୍ଷା କର୍ମୀ ଙ୍କ ନିଯୁକ୍ତି, ବିଦ୍ୟାଳୟ ଥିବା ଜମିକୁ ବିଦ୍ୟାଳୟ ନାମରେ କରିବା ଏବଂ ପୂର୍ବରୁ ଏହି ବିଦ୍ୟାଳୟର ଏନସିସି ଛାତ୍ର ମାନେ ଜାନୁଆରୀ ୨୬ରେ ରାଜଧାନୀ ଦିଲ୍ଲୀ ଠାରେ ହେଉଥିବା ପରେଡରେ ସାମିଲ ହୋଇଥିବାର ନଜୀର ରହିଥିବା ବେଳେ ଏବେ ଏନସିସିକୁ ବନ୍ଦ କରି ଦିଆଯାଇଛି। ଏଣୁ ଏନସିସି ପୁନଃ ବିଦ୍ୟାଳୟରେ ଚାଲୁ କରିବା ପାଇଁ ପୁରାତନ ଛାତ୍ର ସଂଘ ତରଫରୁ ଜିଲା ପ୍ରଶାସନ ନିକଟରେ ଦାବି କରାଯାଇଛି। ଜିଲା ପ୍ରଶାସନ ଓ ଜିଲା ଶିକ୍ଷା ଅଧିକାରୀଙ୍କୁ ଶୁକ୍ରବାର ପ୍ରଦତ୍ତ ଦାବିପତ୍ରରେ ସଂଘର ସମ୍ପାଦକ ଦୀନବନ୍ଧୁ ପଣ୍ଡା, ଗୋରେଖ ଲାଲ ଦାସ, ବେଦବ୍ୟାସ ଶତପଥୀ, ବିବେକାନନ୍ଦ ସାହୁ, ଦିଲୀପ ମିଶ୍ର ଓ ରାଜେନ୍ଦ୍ର ପାଢ଼ୀଙ୍କ ଦସ୍ତଖତ ରହିଛି।
Popular Categories
Previous article
Next article