ସମ୍ବଲପୁର: ରାଜ୍ୟ ଇପିଏଫ ପେନସନର ସଂଘ ତରଫରୁ ବିଜୁ ସ୍ୱାସ୍ଥ୍ୟ ଯୋଜନା ସମେତ ଅନ୍ୟାନ୍ୟ ସୁବିଧା ପ୍ରଦାନ ପାଇଁ ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ନିକଟରେ ଦାବି କରାଯାଇଛି। ଗୁରୁବାର ପୂର୍ବାହ୍ନରେ ସଂଘର ସମ୍ବଲପୁର ଶାଖା ତରଫରୁ ଉତ୍ତରାଞ୍ଚଳ ରାଜସ୍ୱ କମିଶନରଙ୍କ ଜରିଆରେ ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କୁ ଦାବିପତ୍ର ପ୍ରଦାନ କରାଯାଇଛି। ପ୍ରଧାନମନ୍ତ୍ରୀଙ୍କୁ ଦିଆଯାଇଥିବା ଦାବିପତ୍ର ଅନୁଯାୟୀ, ଦେଶରେ ୭୫ ଲକ୍ଷରୁ ଉର୍ଦ୍ଧ ଇପିଏଫ ପେନସଭୋଗୀ ରହିଛନ୍ତି। ସେମାନଙ୍କୁ ଏବେ ମାସିକ ୫୦୦ ରୁ ୩୫୦୦ ଟଙ୍କା ମଧ୍ୟରେ ମିଳୁଥିବା ବେଳେ ଏହି ଟଙ୍କାରେ ସେମାନଙ୍କ ପରିବାର ଚଳାଇବା କଷ୍ଟକର ହୋଇ ପଡ଼ିଛି।
ଏଣୁ ଇପିଏଫ ପେନସଭୋଗୀ ମାନଙ୍କୁ ଅତି କମରେ ମାସିକ ୯ ହଜାର ଟଙ୍କା ସହିତ ଡିଏ ଏବଂ ଚିକିତ୍ସା ଖର୍ଚ୍ଚ ଦେବା ପାଇଁ ଦାବି କରାଯାଇଛି। ସେହିଭଳି ମୁଖ୍ୟମନ୍ତ୍ରୀଙ୍କୁ ଦିଆଯାଇଥିବା ଦାବିପତ୍ର ଅନୁଯାୟୀ, ଇପିଏଫ ପେନସଭୋଗୀ ମାନଙ୍କର ଆୟ ଅତି ସ୍ୱଳ୍ପ ରହିଥିବାରୁ ସେମାନଙ୍କୁ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ସାମିଲ କରାଯାଇ ଉପକୃତ କରିବା ପାଇଁ ଦାବି କରାଯାଇଛି। ସମ୍ବଲପୁର ଜିଲା ସଂଘର ସଭାପତି ଟଙ୍କଧର ମାଝୀ, ସମ୍ପାଦକ ନାରାୟଣ ସୁବୁଦ୍ଧି, ଉପ ସଭାପତି ବିଜୟ କୁମାର ଧର ଓ ଅନ୍ୟ ସଦସ୍ୟ ମାନେ ଦାବିପତ୍ର ପ୍ରଦାନ ସମୟରେ ଉପସ୍ଥିତ ରହିଥିଲେ।
