ଗୁଣୁପୁର: ସ୍ବେଚ୍ଛାସେବୀ ଗୌରୀ ମିଶ୍ର ଗୁଳିକାଣ୍ଡ ଘଟଣା ଦିନକୁ ଦିନ ଜଟିଳ ପରିସ୍ଥିତି ଆଡକୁ ଗତି କରୁଛି। ମାମଲାକୁ ସମ୍ପୂର୍ଣ୍ଣ ରୂପେ ରଫା ଦଫା କରେଇଦେବାକୁ ଉଦ୍ୟମ ହେଉଥିବା ଚର୍ଚ୍ଚା ହେଉଛି। ଏହି ଘଟଣା ସମ୍ପର୍କରେ ଜାଣିଥିବା ଭି ରାଜେଶ ନାମକ ଯୁବକଙ୍କୁ ବିଶାଖାପାଟଣା ଠାରେ ହତ୍ୟା କରାଯାଇଥିବା ଅଭିଯୋଗ ହୋଇଛି। ପୁଲିସର ଏକ ଟିମ ଆଜି ବିଶାଖାପାଟଣା ଅଭିମୁଖେ ଯାଇଥିବା ବେଳେ ସେଠାରୁ ଫେରିଲେ ହିଁ ପ୍ରକୃତ ସତ୍ୟାସତ୍ୟ ଜଣାପଡ଼ିବ ବୋଲି କୁହାଯାଉଛି। ଥାନା ପରିସରରେ କଟକଣା ଜାରି କରାଯିବା ସହ କାହାରିକୁ ଥାନା ମଧ୍ୟରେ ପ୍ରବେଶ କରାଯାଉ ନ ଥିବା ଜଣାପଡିଛି।
ଗତ ମେ ୧୩ ତାରିଖରେ ବଂଶଧାରା ପୋଲ ଉପରେ କେହି ଦୁର୍ବୃତ୍ତ ଗୌରୀ ମିଶ୍ରଙ୍କୁ ଗୁଳିକରି ହତ୍ୟା କରିଥିଲେ। ପୁଲିସ ତଦନ୍ତ ଜାରି ରଖିଥିଲେ ମଧ୍ୟ କୌଣସି ଟେର ପାଉନଥିବା ବେଳେ ନାଟକୀୟ ଭାବେ ଗତ ୨୫ ତାରିଖରେ ଗୁଣୁପୁର କୁମ୍ଭାର ସାହିର ଭି ଲକ୍ଷ୍ମୀ ନାମକ ଜଣେ ମହିଳା ତାଙ୍କ ପୁଅ ରାଜେଶ ନିଖୋଜ ଥିବା ନେଇ ଗୁଣୁପୁର ଥାନାରେ ଅଭିଯୋଗ କରିଥିଲେ। ଏହି ହତ୍ୟାକାଣ୍ଡ ଘଟଣା ସମ୍ପର୍କରେ ତାଙ୍କ ପୁଅ ଜାଣିଥିବା ଓ ଦୁଇ ଜଣଙ୍କ ନାମ କହିଥିବା ଲକ୍ଷ୍ମୀ ଅଭିଯୋଗରେ ଦର୍ଶାଇଥିଲେ। ତେବେ ଭୁବନେଶ୍ୱରରୁ ବେଙ୍ଗାଳୁରୁ ଯାଉଥିବା ବେଳେ ତାଙ୍କ ପୁଅକୁ ବିଶାଖାପାଟଣାରେ କେହି ଅପହରଣ କରିଥିବା, ଯେହେତୁ ରାଜେଶ ହତ୍ୟାକାରୀଙ୍କୁ ଜାଣିଥିଲା ତେଣୁ ସେମାନେ ହିଁ ଅପହରଣ କରିଥିବା ସନ୍ଦେହ ସମ୍ପର୍କରେ ଥାନାରେ ଜଣାଇଥିଲେ।
