ସମ୍ବଲପୁର: ସମ୍ବଲପୁରର କ୍ଷେତରାଜପୁର ବିଦ୍ୟୁତ ସେକ୍ସନ ଅର୍ନ୍ତଗତ ମନ୍ଦଲିଆ ଠାରେ ବୁଧବାର ପୂର୍ବାହ୍ନରେ ବିଦ୍ୟୁତ ଜନିତ ଦୁର୍ଘଟଣାରେ ଜଣେ ଠିକା ଶ୍ରମିକ ଙ୍କ ମୃତ୍ୟୁ ଘଟିଛି। ମନ୍ଦଲିଆ ଠାରେ ନୂତନ ଶବଦାହ ଗୃହ ନିର୍ମାଣ କାର୍ଯ୍ୟ ଜାରି ରହିଛି। ଏଥି ପାଇଁ ରିଂ ରୋଡ କଡରେ ମନ୍ଦଲିଆ ଛକ ନିକଟରୁ ନୂତନ ଶବଦାହ ଗୃହକୁ ଉଚ୍ଚ କ୍ଷମତା ସମ୍ପନ୍ନ ବିଦ୍ୟୁତ ତାର ଉକ୍ତ ସ୍ଥାନକୁ ନିଆଯାଉଛି। ସେହି କାର୍ଯ୍ୟକୁ ଟାଟା ପାୱାର ପକ୍ଷରୁ ଠିକାରେ ଦିଆଯାଇଥିବା ଏକ କମ୍ପାନୀ ଦ୍ୱାରା କରାଯାଉଛି। କ୍ଷେତରାଜପୁର ସେକ୍ସନର ଏସଡିଓ ଡମ୍ବରୁଧର ଓଝାଙ୍କ ସୂଚନାନୁଯାୟୀ, କାର୍ଯ୍ୟ ଚାଲିଥିବା ନୂତନ ତାରରେ ବିଦ୍ୟୁତ ଚାର୍ଜ ନ ଥିଲା। ବରଗଡ଼ ଜିଲାର ମୂଳ ନିବାସୀ ତଥା ଠିକା ଶ୍ରମିକ ମୁର୍ତ୍ତି ବେରିହା (୩୬) ପୋଲ ଉପରେ ଚଢ଼ି କାର୍ଯ୍ୟରତ ରହିଥିବା ବେଳେ ଅଚାନକ ଉଚ୍ଚ କ୍ଷମତା ସମ୍ପନ୍ନ ବିଦ୍ୟୁତ ଚାର୍ଜ ହୋଇ ଯାଇଥିଲା। ଫଳରେ ବିଦ୍ୟୁତ ଆଘାତରେ ଘଟଣାସ୍ଥଳରେ ଶ୍ରମିକ ଶ୍ରୀ ବେରିହାଙ୍କ ମୃତ୍ୟୁ ହୋଇଯାଇଥିଲା। ଘଟଣାର ଖବର ପାଇ ଟାଟା ପାୱାର ର ଉପରିସ୍ଥ ଅଧିକାରୀ ଙ୍କ ସହିତ ଘଟଣାସ୍ଥଳକୁ ପରିଦର୍ଶନ କରାଯାଇ ଅଗ୍ନିଶମ ବିଭାଗକୁ ଖବର ଦିଆଯାଇଥିଲା। ଅଞ୍ଚଳର ବିଦ୍ୟୁତ ସରବରାହକୁ ବିଚ୍ଛିନ୍ନ କରି ମୃତକ ଙ୍କ ଶବକୁ ଉଦ୍ଧାର କରାଯାଇଛି। ଏହି ଘଟଣାକୁ ନେଇ ଏକ ଉଚ୍ଚସ୍ତରୀୟ କମିଟି ଗଠନ କରାଯାଇଛି। ଏହି ତାରରେ ବିଜୁଳି ସଂଯୋଗ କରାଯାଇ ନ ଥିବା ବେଳେ କିଭଳି ଭାବରେ ସେହି ତାରକୁ ବିଦ୍ୟୁତ କରେଣ୍ଟ ଗଲା, ତାହାକୁ ନେଇ କମ୍ପାନୀ ପକ୍ଷରୁ ତଦନ୍ତ ଜାରି ରହିଛି ବୋଲି କମ୍ପାନୀ ସୂତ୍ରରୁ ପ୍ରକାଶ।
Popular Categories
Previous article
Next article