ସମାଜ ଡିଜିଟାଲ ଡେସ୍କ: ନେପାଳରେ ସାମାଜିକ ଗଣମାଧ୍ୟମକୁ ନିଷିଦ୍ଧ କରାଯିବା ପ୍ରତିବାଦରେ ଜେନ-ଜେଡ୍ର ଆନ୍ଦୋଳନ ଯୋଗୁ ସରକାରର ପତନ ଘଟିଛି। ଦେଶ ଶାସନ ଡୋର ସମ୍ଭାଳିବା ଲାଗି ଅନ୍ତରୀଣ ସରକାର ଗଠନ ହେବା ପ୍ରକ୍ରିୟା ଆରମ୍ଭ ହୋଇଛି। ହେଲେ ଏହା ପୂର୍ବରୁ ଜେନ୍-ଜେଡ୍ ଦୁଇଫାଳ ହୋଇଥିବା ଚର୍ଚ୍ଚା ହେଉଛି। ଅନ୍ତରୀଣ ସରକାର ଗଠନ ଲାଗି ଆଲୋଚନା ସମୟରେ ସୁପ୍ରିମକୋର୍ଟର ପୂର୍ବତନ ପ୍ରଧାନ ବିଚାରପତି ସୁଶୀଳା କାର୍କି ନେତୃତ୍ଵ ନେବେ ବୋଲି ନିଷ୍ପତ୍ତି ହୋଇଥିଲା। ହେଲେ ଗୁରୁବାର ଅନ୍ତରୀଣ ସରକାର ଗଠନ ପ୍ରସଙ୍ଗ ନୂଆ ମୋଡ଼ ନେଇଛି।
ଜେନ-ଜେଡ୍ ବିକ୍ଷୋଭକାରୀଙ୍କ ଗୋଟିଏ ଗୋଷ୍ଠୀ ସୁଶୀଳାଙ୍କୁ ସମର୍ଥନ ଦେବାକୁ ଅମଙ୍ଗ ହୋଇଛି। ଏହି ଗୋଷ୍ଠୀ ନେପାଳ ବୈଦ୍ୟୁତିକ ପ୍ରାଧିକରଣ(ଏନଇଏ)ର ପୂର୍ବତନ କାର୍ଯ୍ୟକାରୀ ମୁଖ୍ୟ କୁଲମନ ଘିସିଂଙ୍କୁ ଅନ୍ତରୀଣ ପ୍ରଧାନମନ୍ତ୍ରୀ କରିବାକୁ ପ୍ରସ୍ତାବ ଦେଇଛି। ସମ୍ବିଧାନ ସୁଶୀଳାଙ୍କୁ ପ୍ରଧାନମନ୍ତ୍ରୀ ହେବାର ଅଧିକାର ଦେଉନାହିଁ ବୋଲି ଏହି ଗୋଷ୍ଠୀ କହିଛି।
ଜେନ-ଜେଡର ଦୁଇଟି ଗୋଷ୍ଠୀ ମଧ୍ୟରେ ମତଭେଦ ହେବା ବିକ୍ଷୋଭକାରୀଙ୍କ ମଧ୍ୟରେ ଥିବା ମତପାର୍ଥକ୍ୟକୁ ଦର୍ଶାଇଛି। ସୂଚନାଯୋଗ୍ୟ, ହଜାର ହଜାର ଯୁବଗୋଷ୍ଠୀ ପ୍ରଥମେ ଅନଲାଇନ ଭୋଟିଂ ଜରିଆରେ ସୁଶୀଳାଙ୍କ ନାମକୁ ସମର୍ଥନ କରିଥିଲେ। କିନ୍ତୁ ପରବର୍ତ୍ତୀ ସମୟରେ ଯୁକ୍ତିରେ ଦର୍ଶାଯାଇଥିଲା ଯେ ମୁଖ୍ୟ ବିଚାରପତି ଅଥବା ବିଚାରପତି ପ୍ରଧାନମନ୍ତ୍ରୀ ହୋଇପାରିବେ ନାହିଁ।
