ନୂଆଦିଲ୍ଲୀ : ଲକ ଡାଉନ ସମୟରେ ଦିଲ୍ଲୀ ଛାତ୍ରଛାତ୍ରୀ ଓ ଅଭିଭାବକମାନଙ୍କ ପାଇଁ ଖୁସ ଖବର ପହଞ୍ଚିଛି। ଦିଲ୍ଲୀର ଉପମୁଖ୍ୟମନ୍ତ୍ରୀ ମନୀଷ ସିଶୋଦିଆ କହିଛନ୍ତି ଯେ, ସରକାରୀ ଅନୁମତି ବିନା ଘରୋଇ ବିଦ୍ୟାଳୟଗୁଡ଼ିକ ଫି ବୃଦ୍ଧି କରି ପାରିବେ ନାହିଁ। ଯଦି କୌଣସି ଘରୋଇ ଅନୁଷ୍ଠାନ ନିୟନ ଉଲ୍ଲଙ୍ଘନ କରନ୍ତି ସେମାନଙ୍କ ବିରୋଧରେ ଦୃଢ କାର୍ୟ୍ୟାନୁଷ୍ଠାନ ଗ୍ରହଣ କରାଯିବ। ବିଦ୍ୟାଳୟଗୁଡ଼ିକ ମାସିକିଆ ଫି ସଂଗ୍ରହ କରିପାରିବେ, ହେଲେ ପରିବହନ ଶୁଳ୍କ ପିଲାମାନଙ୍କ ଠାରୁ ଆଦାୟ କରିପାରିବେ ନାହିଁ।
କରୋନା ଭୂତାଣୁ କାରଣରୁ ଦେଶରେ ଶିକ୍ଷା ଏବଂ ଅର୍ଥନୀତି କ୍ଷେତ୍ର ସବୁଠାରୁ ଅଧିକ ପ୍ରଭାବିତ ହେଉଛି। କେତେକ ବିଦ୍ୟାଳୟ ବର୍ଦ୍ଧିତ ଶୁଳ୍କ ଆଦାୟ କରୁଥିବା ଅଭିଯୋଗ ଆସିଥିଲା। ଏହି ଖବର ପାଇବାପରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ନିର୍ଦ୍ଦେଶ ଦେଇଛନ୍ତି ଯେ, ଦିଲ୍ଲୀର ଘରୋଇ ବିଦ୍ୟାଳୟଗୁଡ଼ିକ ସରକାରଙ୍କୁ ନ ପଚାରି ଫି ବୃଦ୍ଧି କରିପାରିବେ ନାହିଁ। ଏହା ସହ ଏକାସାଙ୍ଗରେ ପିଲାମାନଙ୍କଠାରୁ ତିନିମାସ ଶୁଳ୍କ ସଂଗ୍ରହ କରାଯାଇ ପାରିବ ନାହିଁ।
