ଫୁଲବାଣୀ:ଆଶିଷ ଈଶ୍ୱର ପାଟିଲ କନ୍ଧମାଳ ଜିଲାର ନୂତନ ଜିଲାପାଳ ଭାବେ ଦାୟିତ୍ୱ ଗ୍ରହଣ କରିବେ। ସେ ବର୍ତ୍ତମାନ ବାଲେଶ୍ୱର ଉପଜିଲାପାଳ ଓ ବାଲେଶ୍ୱର ପୌର ପରିଷଦର ନିର୍ବାହୀ ଅଧିକାରୀ ଭାବେ କାର୍ଯ୍ୟରତ ରହିଛନ୍ତି। ଆଜି ଶ୍ରୀ ପାଟିଲଙ୍କୁ ରାଜ୍ୟ ସରକାର କନ୍ଧମାଳ ଜିଲାପାଳ ଭାବେ ବଦଳି କରିଛନ୍ତି। ସେହିଭଳି କନ୍ଧମାଳ ଜିଲାପାଳ ଥିବା ଡା.ବୃନ୍ଦା.ଡ଼ିଙ୍କ ଓଏସଏମସିଏଲ ପରିଚାଳନା ନିର୍ଦ୍ଦେଶକ ଭାବେ ବଦଳି ହୋଇଛି। ଡା.ବୃନ୍ଦା.ଡ଼ି ଦୀର୍ଘ ୫ ବର୍ଷରୁ ଉର୍ଦ୍ଧ ସମୟ ଧରି କନ୍ଧମାଳ ଜିଲାର ଜିଲାପାଳ ଭାବେ ଦାୟିତ୍ୱ ତୁଲାଇଛନ୍ତି। ନିଷ୍ଠା ଓ ଆନ୍ତରିକତାର ସହିତ କାର୍ଯ୍ୟକରିବା ଯୋଗୁଁ ତାଙ୍କ ସମୟରେ କୃଷି ଓ ଉଦ୍ୟାନ, ମନରେଗା ଭଳି ବିିଭିନ୍ନ କ୍ଷେତ୍ରରେ ଉଲ୍ଲେଖନୀୟ କାର୍ଯ୍ୟପାଇଁ କନ୍ଧମାଳଜିଲା ଏକାଧିକ ଥର ଜାତୀୟ ସ୍ତରରେ ପୁରସ୍କୃତ ହୋଇଥିଲା। ସେହିଭଳି ଜିଲାରେ ନୂତନ ମେଡ଼ିକାଲ୍ କଲେଜ ପ୍ରତିଷ୍ଠାରେ ତାଙ୍କର ଅବଦାନ ଯଥେଷ୍ଟ ରହିଥିବା ବେଳେ ଫୁଲବାଣୀ ସହରରେ ସାଇନ୍ସ ପାର୍କ, ସ୍କାର୍ଟ ପାର୍କ ସହିତ ଇ-ଲାଇବ୍ରେରୀ ଓ ୮୩ଟି ସ୍କାର୍ଟ ସ୍କୁଲ ନିର୍ମାଣ, ବିଭିନ୍ନ ଅଞ୍ଚଳର ଗମନାଗମନ ସୁବ୍ୟବସ୍ଥା କରିଥିଲେ। ସାଧାରଣ ନିର୍ବାଚନ ଠାରୁ ଆରମ୍ଭ କରି ପଞ୍ଚାୟତ ଓ ପୌର ନିର୍ବାଚନକୁ ମଧ୍ୟ ଶାନ୍ତି ଶୃଙ୍ଖଳାର ସହିତ ପରିଚାଳନା କରିଥିଲେ।
Comments are closed.