ନୂଆଦିଲ୍ଲୀ : ନିଟ୍-ୟୁଜି ପରୀକ୍ଷାରେ କପି ଓ ପ୍ରଶ୍ନପତ୍ର ପ୍ରଘଟ ନେଇ ବିବାଦ ଲାଗି ରହିଥିବାବେଳେ ସୁପ୍ରିମକୋର୍ଟରେ ଏ ସମ୍ପର୍କିତ ମାମଲାର ଶୁଣାଣି ଜୁଲାଇ ୮ରେ ହେବ। ଏଭଳି କ୍ଷେତ୍ରରେ ଏହାର କାଉନସେଲିଂକୁ ନେଇ ଅନିଶ୍ଚିତତା ଦେଖାଯାଇଛି। ନିଟ୍-ୟୁଜି ପରୀକ୍ଷାରେ କୃତକାର୍ଯ୍ୟ ଛାତ୍ରଛାତ୍ରୀମାନେ କେଉଁ ମେଡିକାଲ କଲେଜରେ ନାମ ଲେଖାଇବେ ତାକୁ ନେଇ କାଉନସେଲିଂ କେବେ ଆରମ୍ଭ ହେବ ତାହା ଜଣାପଡି ନାହିଁ। ପୂର୍ବରୁ ଜୁଲାଇ ୬ରୁ ନିଟ୍ ୟୁଜି କାଉନସେଲିଂ ଆରମ୍ଭ ହେବା ନେଇ ନ୍ୟାସନାଲ ଟେଷ୍ଟିଂ ଏଜେନ୍ସି (ଏନଟିଏ) ପକ୍ଷରୁ ଦିନ ଧାର୍ଯ୍ୟ କରାଯାଇଥିଲା। ମାତ୍ର ଜୁଲାଇ ୬ରୁ କାଉନସେଲିଂ ଆରମ୍ଭ ହୋଇପାରି ନାହିଁ। ଏନଟିଏ କହିବା ଆଧାରରେ କାଉନସେଲିଂ ପ୍ରକ୍ରିୟାକୁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ସ୍ଥଗିତ ରଖାଯାଇଥିବା କୁହାଯାଉଛି। କାଉନସେଲିଂ ସ୍ଥଗିତ ରହିବା ଖବରକୁ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ଅସ୍ବୀକାର କରି କାଉନସେଲିଂକୁ ସ୍ଥଗିତ ରଖାଯାଇ ନଥିବା କହିଛି। କାଉନସେଲିଂ କେବେ ଆରମ୍ଭ ହେବ ସେ ସମ୍ପର୍କରେ ଛାତ୍ରଛାତ୍ରୀଙ୍କୁ ଅବଗତ କରାଯିବ। ଅଦାଲତ ରାୟ ପରେ କାଉନସେଲିଂ ଆରମ୍ଭ ହୋଇପାରେ।
Comments are closed.