ନୂଆଦିଲ୍ଲୀ: ସଂସଦର ବଜେଟ ଅଧିବେଶନ ଆରମ୍ଭ ହେବା ମାତ୍ରେ ବିରୋଧୀଙ୍କ ହଙ୍ଗାମା । ଗୃହରେ ନିଟ୍ ପ୍ରସଙ୍ଗରେ ସରକାରଙ୍କୁ ଘେରିଛନ୍ତି ବିରୋଧୀ । କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଟାର୍ଗେଟ କରିଛନ୍ତି ବିରୋଧୀ ଦଳର ନେତା ରାହୁଲ ଗାନ୍ଧୀ । ସାରା ଦେଶରେ ପରୀକ୍ଷା ବ୍ୟବସ୍ଥାରେ ବଡ ଧରଣର ଘୋଟାଲା ହୋଇଥିବା ରାହୁଲ କହିଛନ୍ତି । ପରୀକ୍ଷା ସହିତ ଲକ୍ଷ ଲକ୍ଷ ଛାତ୍ରଛାତ୍ରୀ ଜଡିତ ଥିବାବେଳେ ଟଙ୍କା ଦେଇ ପରୀକ୍ଷା ବ୍ୟବସ୍ଥାକୁ କିଣାଯାଇଛି । ଯଦି ଆପଣ ଧନୀ ଏବଂ ଆପଣଙ୍କ ପାଖରେ ଅର୍ଥ ଅଛି, ତେବେ ଆପଣ ଭାରତୀୟ ପରୀକ୍ଷା ବ୍ୟବସ୍ଥାକୁ କିଣିପାରିବେ । କାରଣ ଲୋକ ଜାଣିଛନ୍ତି ଯେ ଟଙ୍କା ଦ୍ୱାରା ପେପର କିଣାଯାଇପାରିବ ବୋଲି ସାଂଘାତିକ ଅଭିଯୋଗ ଆଣିଛନ୍ତି ରାହୁଲ । ଏଭଳି କରି ଛାତ୍ରଛାତ୍ରୀଙ୍କ ଭବିଷ୍ୟତ ସହ ଖେଳ ଖେଳାଯାଉଛି । କେବଳ ନିଟ୍ ପରୀକ୍ଷା ନୁହେଁ ଗୋଟିଏ ପରେ ଗୋଟିଏ ପେପର ଲିକ୍ ଘଟଣା ସାମ୍ନାକୁ ଆସୁଛି । ହେଲେ ସବୁ ଘଟଣାରେ କାର୍ଯ୍ୟାନୁଷ୍ଠାନ ଶୂନ । ଛୋଟ ମାଛକୁ ଗିରଫ କରି ବଡ ମାଛକୁ ସୁରକ୍ଷା ଦିଆଯାଉଥିବା କହିଛନ୍ତି ବିରୋଧୀ ଦଳ ନେତା ରାହୁଲ ଗାନ୍ଧୀ । ସରକାରଙ୍କ ଜାଣତରେ ପ୍ରଶ୍ନପତ୍ର ପ୍ରଘଟ ହୋଇଛି । ହେଲେ ନିଜ ଦୋଷ ଛଡା ଅନ୍ୟ ସମସ୍ତଙ୍କ ଉପରେ ଦୋଷ ଦେବାରେ ବ୍ୟସ୍ତ କେନ୍ଦ୍ରଶିକ୍ଷା ମନ୍ତ୍ରୀ । ଅନ୍ୟପଟେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ରାହୁଲଙ୍କ ମନ୍ତବ୍ୟ ଦୁର୍ଭାଗ୍ୟଜନକ । ସମଗ୍ର ପରୀକ୍ଷା ବ୍ୟବସ୍ଥାକୁ ପ୍ରଶ୍ନ କରିବା ନିନ୍ଦନୀୟ ।
Comments are closed.