ଭୁବନେଶ୍ବର : ଉପନିର୍ବାଚନରେ ବିପୁଳ ବିଜୟ ପରେ ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବାଲେଶ୍ଵର ଓ ତିର୍ତ୍ତୋଲ ବାସୀଙ୍କ ସହିତ କଥା ହୋଇଛନ୍ତି। ଭିଡିଓ କନଫରେନ୍ସ ମାଧ୍ୟମରେ ବାଲେଶ୍ଵର ଓ ତିର୍ତ୍ତୋଲରେ ଆୟୋଜିତ ସଭାକୁ ନବୀନ ଉଦବୋଧନ ଦେଇଛନ୍ତି। ଯେଉଁଭଳି ଭାବେ ବିଜେଡିକୁ ଲୋକେ ବିଶ୍ବାସକୁ ନେବା ସହ ଅଦ୍ଭୂତପୂର୍ବ ସଫଳତା ଦେଲେ ସେନେଇ ନିର୍ବାଚନ ମଣ୍ଡଳୀର ଲୋକଙ୍କୁ କୃତଜ୍ଞତା ଜଣାଇଛନ୍ତି ନବୀନ ।
ଭିଡିଓ କନଫରେନ୍ସ ମାଧ୍ୟମରେ ଆୟୋଜିତ ଏହି କାର୍ଯ୍ୟକ୍ରମ ସମୟରେ ବହୁ ସଂଖ୍ୟାରେ କର୍ମକର୍ତ୍ତାମାନଙ୍କ ସହ ବାଲେଶ୍ଵର ଓ ତିର୍ତ୍ତୋଲରୁ ବିଜୟ ଲାଭ କରିଥିବା ଦୁଇ ବିଜେଡି ବିଧାୟକ ସ୍ବରୂପ ଦାସ ଓ ବିଜୟ ଶଙ୍କର ଦାସ ମଧ୍ୟ ନିଜ ନିଜ ନିର୍ବାଚନ ମଣ୍ଡଳି ସଭାରେ ଉପସ୍ଥିତି ରହିଥିଲେ। ଏହି ଅବସରରେ ବିଜେଡି ସୁପ୍ରିମୋ ନବୀନ ପଟ୍ଟନାୟକ ପ୍ରଥମେ ତିର୍ତ୍ତୋଲ ବାସୀଙ୍କ ସହ ଭିଡିଓ କନଫରେନ୍ସରେ କଥା ହୋଇ କହିଥିଲେ କି ‘ତିର୍ତ୍ତୋଲବାସୀଙ୍କ ପାଖରେ ମୁଁ ଋଣି। ବିଜୟ ପାଇଁ ଆମ କର୍ମୀମାନେ ବହୁତ ପରିଶ୍ରମ କରିଛନ୍ତି।କରୋନା କାଳରେ ନିୟମ ମାନି କାମ କରିଥିବାରୁ ଆପଣଙ୍କୁ ଧନ୍ୟବାଦ। ଏଥି ସହିତ ବିଜୟୀ ହୋଇଥିବା ବିଜୟ ଶଙ୍କରଙ୍କୁ ମୋର ଅଭିିନନ୍ଦନ। ତିର୍ତ୍ତୋଲର ବିକାଶ ପାଇଁ ଆପଣ କାମ ଜାରି ରଖନ୍ତୁ।କରୋନା ସମୟରେ ଲୋକଙ୍କ ପାଖକୁ ଯାଆନ୍ତୁ ଓ ଲୋକଙ୍କ ସମସ୍ୟା ବୁଝନ୍ତୁ।’
ସେହିପରି ବାଲେଶ୍ବର ବାସୀଙ୍କୁ ମଧ୍ୟ ନିର୍ବାଚନୀ ସଫଳତା ନେଇ ନବୀନ ଅଭିନନ୍ଦନ ଜଣାଇଛନ୍ତି। ନବୀନ କହିଥିଲେ କି ‘କରୋନା କାଳରେ ପ୍ରଚାର ଏତେ ସହଜ ନଥିଲା । ମାତ୍ର ଦଳର ବିଜୟ ପାଇଁ ଦଳର କର୍ମୀମାନେ ସବୁ ନିୟମ ମାନି ଯେଉଁ ପରିଶ୍ରମ କରିଛନ୍ତି ସେଥିପାଇଁ ଧନ୍ୟବାଦ। ଭୂତାଣୁ ଭୟ ଭିତରେ ମଧ୍ୟ ଘରୁ ବାହାରି ଭୋଟ ଦେଇଥିବା ସମସ୍ତ ଜନତାଙ୍କୁ ଧନ୍ୟବାଦ।’ ଏହି ଅବସରରେ ବାଲେଶ୍ବରର ବିଜୟୀ ପାର୍ଥୀ ସ୍ବରୂପ ଦାସ ମଧ୍ୟ ନିଜ ବିଜୟ ପାଇଁ ନବୀନଙ୍କୁ ଧନ୍ୟବାଦ ଜଣାଇବା ସହ ଲେଶ୍ୱରବାସୀଙ୍କ ସହ ସମସ୍ତ କର୍ମକର୍ତ୍ତାଙ୍କୁ ମଧ୍ୟ ଧନ୍ୟବାଦ ଜଣାଇଥିଲେ।
ଉଲ୍ଲେଖଯୋଗ୍ୟ ବାଲେଶ୍ବର ସଦର ଓ ତିର୍ତ୍ତୋଲ ନିର୍ବାଚନ ମଣ୍ଡଳୀରେ ଉପନିର୍ବାଚନ ହୋଇଥିଲା । ନଭେମ୍ବର ୩ ତାରିଖରେ ମତଦାନ ହୋଇଥିବାବେଳେ ୧୦ ତାରିଖରେ ଗଣତି ହୋଇଥିଲା । ତେବେ ଦୁଇଟି ଯାକ ନିର୍ବାଚନ ମଣ୍ଡଳୀରେ ବିଜେଡି ବାଜିମାତ କରିଥିଲା । ବାଲେଶ୍ବର ସଦରରୁ ବିଜେଡି ପ୍ରାର୍ଥୀ ସ୍ବରୂପ ଦାସ ବିଜୟୀ ହୋଇଥିବାବେଳେ ତିର୍ତ୍ତୋଲରେ ବିଜେଡି ପ୍ରାର୍ଥୀ ବିଜୟ ଶଙ୍କର ଦାସ ବିଜୟୀ ହୋଇଥିଲେ ।
Comments are closed.