ପୋର୍ଟ ବ୍ଲେୟାରରେ ନୌସେନା ଯବାନଙ୍କ ମୃତ୍ୟୁ, ରାଷ୍ଟ୍ରୀୟ ମର୍ଯ୍ୟାଦା ସହ ଗ୍ରାମ ଶ୍ମଶାନରେ ଶେଷକୃତ୍ୟ
ତିଗିରିଆ : ଭାରତୀୟ ନୌସେନାରେ କାର୍ଯ୍ୟରତ ତିଗିରିଆ ବ୍ଲକ୍ ଅନ୍ତର୍ଗତ ଅଚଳକୋଟ ଗ୍ରାମର ଶ୍ରୀନିବାସ ବେହେରାଙ୍କ ପୁଅ ଜନସନ୍ ବେହେରାଙ୍କ ଗତ ତିନି ତାରିଖ ଦିନ କାର୍ଯ୍ୟସ୍ଥଳ ପୋର୍ଟ ବ୍ଲେୟାରରେ ପରଲୋକ ଘଟିଥିଲା। ତେବେ ତାଙ୍କ ମୃତ୍ୟୁର କାରଣ ଅସ୍ପଷ୍ଟ ରହିଥିବା ବେଳେ ଏହି ଦୁଃଖଦ ଖବରକୁ ନେଇ ଅଞ୍ଚଳରେ ଗଭୀର ଶୋକ ପ୍ରକାଶ ପାଇଛି। ନିଜ ଜନ୍ମମାଟି ଅଚଳକୋଟ ଗ୍ରାମରେ ଜନସନଙ୍କ ମୃତ ଦେହ ପହଞ୍ଚିବା ପରେ ଅଞ୍ଚଳବାସୀଙ୍କ ପକ୍ଷରୁ ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଥିଲା। ଖବର ପାଇ ଆଠଗଡ଼ ବିଧାୟକ ତଥା ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ଵାଇଁ ପହଞ୍ଚି ମୃତକଙ୍କ ଶୋକ ସନ୍ତପ୍ତ ପରିବାରକୁ ସମବେଦନା ଜଣାଇବା ସହ ମରଶରୀରକୁ କାନ୍ଧ ଦେଇ ଶ୍ମଶାନକୁ ନେଇଥିଲେ ଓ ସେଠାରେ ଶେଷ ସମ୍ମାନ ଜଣାଇଥିଲେ । ଗ୍ରାମ ଶ୍ମଶାନରେ ନୌସେନା ଅଧିକାରୀଙ୍କ ଉପସ୍ଥିତିରେ ରାଷ୍ଟ୍ରୀୟ ମର୍ଯ୍ୟାଦା ସହ ଶେଷକୃତ୍ୟ ସମ୍ପନ୍ନ କରାଯାଇଥିଲା ।
ଜନସନଙ୍କ ମୃତ୍ୟୁର କାରଣ ନେଇ ତଦନ୍ତ ଚାଲୁ ରହିଥିବାବେଳେ ପରେ ଏହା ସ୍ପଷ୍ଟ ହେବ ବୋଲି ମରଶରୀର ଧରି ଆସିଥିବା ନୌବାହିନୀ ଅଧିକାରୀ ଗଣମାଧ୍ୟାମକୁ ସୂଚନା ଦେଇଛନ୍ତି। ଅନ୍ୟ ପଟରେ ପରିବାର ପକ୍ଷରୁ ମିଳିଥିବା ସୂଚନା ମୁତାବକ କିଛି ଦିନ ତଳେ ଜନସନ ଘରକୁ ଛୁଟି ନେଇ ଆସିଥିଲେ, ଘରେ ଥିବା ବେଳେ ଜନସନ୍ ସେମିତି କିଛି ଚାପରେ ନଥିବା ପରିବାର ଲୋକେ କହିଛନ୍ତି। ୨୦୧୯ ମସିହାରେ ଜନସନ୍ ନୌସେନାରେ ଯୋଗ ଦେଇଥିଲେ ବୋଲି ପରିବାର ସୂତ୍ରରୁ ସୂଚନା ମିଳିଛି।
Comments are closed.