ନୂଆଦିଲ୍ଲୀ : ମୋଦୀ ସରକାରଙ୍କ ‘ବେଟି ବଚାଓ, ବେଟି ପଢାଓ’ ପରେ ଏକ ରାଜ୍ୟରେ ‘ହାମାରେ ଗାଓଁ କି ବେଟି, ହାମାରି ସାନ’ ଯୋଜନା ଲାଗୁ କରାଯାଇଛି । ଏହି ଯୋଜନା ଅନୁଯାୟୀ ଗାଁର ସମସ୍ତ ଦୋକନାରେ ଝିଅମାନଙ୍କ ନାମ ଲେଖାଯାଇଛି । ପରିବାରରେ ପୁଅଙ୍କ ଭଳି ଝିଅମାନଙ୍କୁ ମଧ୍ୟ ଅଧିକ ଗୁରୁତ୍ବ ଦେବାକୁ ଏହି ଯୋଜନାର ଲକ୍ଷ୍ୟ ରହିଛି । ଏହା ଦ୍ବାରା ଝିଅଙ୍କ ମନରେ ଆତ୍ମବିଶ୍ବାସ ବୃଦ୍ଧି ପାଇଛି । ଏଭଳି ଏକ ସ୍ବତନ୍ତ୍ର ଯୋଜନା ହିମାଚଳ ପ୍ରଦେଶର ଉନାରେ ଲାଗୁ କରାଯାଇଛି ।
ପୂର୍ବରୁ ନିଜ ପୁଅମାନଙ୍କ ନାମରେ ଦୋକାନ ନାମକରଣ କରାଯାଉଥିବା ବେଳେ ଏହି ଯୋଜନା ଲାଗୁ ହେବା ପରେ ବର୍ତ୍ତମାନ ଗାଁରେ ସମସ୍ତ ଦୋକାନ ଝିଅଙ୍କ ନାମରେ ନାମିତ ହେଉଥିବା ଦେଖିବାକୁ ମିଳିଛି । ସେଠାରେ ଥିବା ଦୋକାନ ଗୁଡିକ ନାମ ଅର୍ଚ୍ଚିତା ନବ ଦୁର୍ଗା ବ୍ୟୁଟି ସେଲୁନ, ପଲ୍ଲବୀ ବଶିଷ୍ଠ ଅଟୋ କେୟାର, ମେଘା ପିଜା ହଟ୍, ନାଜିଆ ଶୁଜ ଆଣ୍ଡ ଚପଲ ହାଉସ ଇତ୍ୟାଦି । ଦୋକାନରେ ଲଗାଯାଉଥିବା ନେମ ପ୍ଲେଟ ମାମୁଲି ଦେଖା ଯାଉଥିଲେ ମଧ୍ୟ ଝିଅମାନଙ୍କୁ ଏହା ସ୍ବତନ୍ତ୍ର ଅଧିକାର ଏବଂ ପରିଚୟ ଦେଇଛି।
ମହିଳା ଏବଂ ବାଳ ବିକାଶ ଜିଲ୍ଲା ପ୍ରୋଗ୍ରାମିଙ୍ଗ ଅଧିକାରୀ ସତନାମ ସିଂହଙ୍କ ସୂଚନା ଅନୁଯାୟୀ, ପ୍ରଥମେ ଲୋକାମାନେ ଏହାକୁ ବିରୋଧ କରୁଥିଲେ ଏବଂ ଏହାକୁ ମାନିବାକୁ ନାରାଜ ଥିଲେ । କିନ୍ତୁ ପରେ ଧୀରେ ଧୀରେ ଲୋକମାନେ ଏହାକୁ ଗ୍ରହଣ କରିବା ସହ ନିଜ ଝିଅମାନଙ୍କ ନାମରେ ଦୋକାନର ନାମ ରଖିଲେ । ଅଧିକାରୀଙ୍କ କହିବା ଅନୁଯାୟୀ, ଏହା ଦ୍ୱାରା ଝିଅମାନେ ସଶକ୍ତ ହୋଇପାରିବେ । ପ୍ରତି ପଚାଂୟତରେ କୁହାଯାଇଛି ଯେ, ସେମାନେ ତିନି ଜଣ ଝିଅଙ୍କ ନାମ ଦିଅନ୍ତୁ ସେମାନଙ୍କର ଫଟୋ ପୋଷ୍ଟରରେ ଲଗାଯିବ । ଯେଉଁଥିରେ ‘ହାମାରେ ଗାଓଁ କି ବେଟି, ହାମାରି ସାନ’ ଫଳକରେ ଲେଖାଯିବ ।
ଅମ୍ବୋଆ ଗ୍ରାମର ପ୍ରୀତିଶର୍ମା ନାମକ ଜଣେ ଝିଅର ଫଟୋ ପୋଷ୍ଟର ଲାଗିଛି । ସେ ଏମବିବିଏସ ପଢି ସାରିଛନ୍ତି ଏବଂ ବର୍ତ୍ତମାନ ସେ ଏମଡି ପାଇଁ ପ୍ରସ୍ତୁତ ହେଉଛନ୍ତି । ଘର ବାହାରେ ଲାଗୁଥିବା ଫଳକରେ ମଧ୍ୟ ପରିବର୍ତ୍ତନ କରାଯାଇ ମହିଳାମାନଙ୍କ ନାମ ରଖାଯାଉଥିବା ଦେଖିବାକୁ ମିଳିଛି ।
