ସିବିଏସ୍ଇ ୧୦ମ ପରୀକ୍ଷାରେ ଜଣେ ମୁସଲମାନ ଛାତ୍ର ସଂସ୍କୃତରେ ୧୦୦ରୁ ୧୦୦ ନମ୍ବର ରଖିଛନ୍ତି । ଏହି ଛାତ୍ରଜଣକ ହେଲେ ଗ୍ରେଟର ନୋଏଡ଼ାସ୍ଥିତ ଦିଲ୍ଲୀ ପବ୍ଲିକ୍ ସ୍କୁଲର ମହମ୍ମଦ ଜୈଦ ।
ଜୈଦଙ୍କ ବାପା ଓ ମା ଉଭୟ ଡ଼ାକ୍ତର ଓ ସେମାନେ ଜୈଦଙ୍କୁ ତାଙ୍କର ବିଷୟ ନିର୍ବାଚନରେ ପୁରା ସ୍ବାଧୀନତା ଦେଇଥିଲେ । ଉଦାର ଓ ସଂସ୍କାରବାଦୀ ପିତାମାତାଙ୍କ ସଂସ୍କାର ଜୈଦଙ୍କଠାରେ ଦେଖିବାକୁ ମିଳିଥିଲା ଓ ସଂସ୍କୃତ ଶିକ୍ଷକ ସୁଧାକର ମିଶ୍ରଙ୍କ ନିକଟରେ ସେ ସଂସ୍କୃତ ଶିକ୍ଷା କରୁଥିଲେ । ଜୈଦ ତାଙ୍କର ସଂସ୍କୃତରେ ଶତ ପ୍ରତିଶତ ନମ୍ବର ମିଳିବାର ଶ୍ରେୟ ସଂସ୍କୃତ ଶିକ୍ଷକ ସୁଧାକର ମିଶ୍ରଙ୍କୁ ଦେଇଛନ୍ତି । ଜୈଦଙ୍କ ଏହି ସଫଳତା ନିମନ୍ତେ ସ୍କୁଲର ଅଧ୍ୟକ୍ଷା ସଂଧ୍ୟା ଅୱସ୍ତି ଶୁଭକାମନା ଜଣାଇଛନ୍ତି । ସେ କହିଛନ୍ତି ଯେ ୪ର୍ଥ ଶ୍ରେଣୀରୁ ଛାତ୍ରଛାତ୍ରୀଙ୍କୁ ବିଷୟ ନିର୍ବାଚନ ନିମନ୍ତେ ସୁଯୋଗ ଦିଆଯାଇଥାଏ । ଜୈଦ ବିକଳ୍ପ ଭାଷା ଭାବରେ ସଂସ୍କୃତକୁ ହିଁ ବାଛିଥିଲେ । ସେହିପରି ସୁଧାକର ମିଶ୍ର କହିଛନ୍ତି ଯେ ସେ ଷଷ୍ଠ ଶ୍ରେଣୀରୁ ଜୈଦଙ୍କୁ ସଂସ୍କୃତ ଶିକ୍ଷା ଦେଇ ଆସୁଛନ୍ତି ଓ ତାଙ୍କର ଏଥିରେ ରୁଚି ଅଛି । ଜୈଦ ବିଜ୍ଞାନରେ ଇଣ୍ଟରମିଡ଼ିଏଟ୍ କରିବାକୁ ଇଚ୍ଛା ବ୍ୟକ୍ତ କରିଛନ୍ତି ଏବଂ ସଂସ୍କୃତ ଓ ବିଜ୍ଞାନକୁ ମିଶାଇ ଗବେଷଣା ଲକ୍ଷ୍ୟ ରଖିଛନ୍ତି । ଜୈଦ ଅନ୍ୟ ବିଷୟରେ ମଧ୍ୟ ଭଲ ନମ୍ବର ରଖିଛନ୍ତି । ସେ ଗଣିତରେ ୯୫, ବିଜ୍ଞାନରେ ୯୫, ସାମାଜିକ ବିଜ୍ଞାନରେ ୯୬, ଆଇଟିରେ ୯୯ ନମ୍ବର ରଖିଛନ୍ତି ।
