ମୁମ୍ବଇ : ଖରାଦିନେ ଆଇସକ୍ରିମ ସଭିଁଙ୍କୁ ପସନ୍ଦ। ପିଲାଙ୍କ ଠାରୁ ଆରମ୍ଭ କରି ବୟସ୍କ ପର୍ଯ୍ୟନ୍ତ ଆଇସକ୍ରିମ ନାଁ ଶୁଣିବା ମାତ୍ରେ ପାଟିରୁ ଲାଳ ବୋହିଥାଏ। ଦୋକାନ ହେଉ ଅଥବା ଅନଲାଇନରୁ ଲୋକେ ବିଭିନ୍ନ ପ୍ରକାର ଆଇସକ୍ରିମ ଅର୍ଡର କରି ଖାଇ ଥାଆନ୍ତି। ମାତ୍ର ମୁମ୍ବଇରୁ ଏପରି ଏକ ଘଟଣା ସାମ୍ନାକୁ ଆସିଛି, ଯାହା ଶୁଣି ଆପଣ ଆଶ୍ଚର୍ଯ୍ୟ ଚକିତ ହେବା ସହ ଆଇସକ୍ରିମ ଖାଇବାକୁ ମଧ୍ୟ ଭୟ ଲାଗିବ। ମହାନଗରର ମଲାଡ ଅଞ୍ଚଳରେ ଜଣେ ମହିଳା ଅନଲାଇନରେ ଆଇସକ୍ରିମ ଅର୍ଡର କରିଥିଲେ। ଏହାପରେ ଯାହା ହେଲା କଳ୍ପନା ମଧ୍ୟ କରି ହେବ ନାହିଁ।
ମହିଳା ଜଣକ ଅନଲାଇନରେ କୋନ୍ ଆଇସକ୍ରିମ ଅର୍ଡର କରିଥିଲେ। ସେହି କୋନ୍ ଆଇସକ୍ରିମ ଭିତରେ ମଣିଷର କଟା ଆଙ୍ଗୁଠି ବାହାରିଥିଲା। ମହିଳା ଜଣକ ଘଟଣା ବିଷୟରେ ପୁଲିସକୁ ଜଣାଇଥିଲେ। ପ୍ରାଥମିକ ତଦନ୍ତରୁୁ ଜଣାପଡିଛି, ଆଇସକ୍ରିମ କୋନ ଭିତରେ ମଣିଷର ଏକ କଟା ଆଙ୍ଗୁଠି ଥିଲା। ପୁଲିସ ଏହି କଟା ଆଙ୍ଗୁଠିକୁ ଫରେନସିକ୍ ଯାଞ୍ଚ ପାଇଁ ପଠାଇଛି। ମହିଳା କୋନରୁ ଅଧିକରୁ ଅଧିକ ଆଇସକ୍ରିମ ଖାଇ ସାରିଥିଲେ। ମାତ୍ର ଯେଭଳି ଜାଣିଲେ ଆଇସକ୍ରିମରେ କଟା ଆଙ୍ଗୁଠି ଅଛି, ସେ କାବା ହୋଇଗଲେ। ଏହି ଘଟଣା ବର୍ତ୍ତମାନ ଚର୍ଚ୍ଚାର ବିଷୟ ପାଲଟିଛି। ଏପର୍ଯ୍ୟନ୍ତ ଖାଦ୍ୟର ଜିନିଷରେ ଅସରପା, ଝିଟିପିଟି ମିଳିବା ଘଟଣା ସାମ୍ନାକୁ ଆସିଥିଲା ମାତ୍ର, ମଣିଷର କଟା ଆଙ୍ଗୁଠି ଘଟଣା ହଇଚଇ ସୃଷ୍ଟି କରିଛି। ଏହି ଆଇସକ୍ରିମ ଏକ ନାମୀ କମ୍ପାନୀର ବୋଲି ଜଣାପଡିଛି। ପୁଲିସ ଘଟଣାର ତଦନ୍ତ ଜାରି ରଖିଛି।
