ମୁମ୍ବଇ : ମୁମ୍ବଇର ମହାରାଷ୍ଟ୍ର ନଗରରେ ଖରାପ ଚିକେନରେ ପ୍ରସ୍ତୁତ ଶୱାରମା ରୋଲ୍ ଖାଇ ଜଣେ ୧୯ ବର୍ଷୀୟ ଯୁବକଙ୍କ ମୃତ୍ୟୁ ଘଟିଛି। ଏହାସହ ଅନ୍ୟ କେତେକଙ୍କ ସ୍ୱାସ୍ଥ୍ୟ ଅବସ୍ଥା ବିଗିଡିବା ପରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ଏହି ଘଟଣାରେ ମାମଲା ରୁଜୁ କରାଯିବା ସହ ପୁଲିସ ଉକ୍ତ ଦୋକାନୀଙ୍କୁ ଗିରଫ କରି ଘଟଣାର ତଦନ୍ତ ଜାରି ରଖିଛି।
ସୂଚନା ଯୋଗ୍ୟ, ମହାରାଷ୍ଟ୍ର ନଗରରେ ୩ ମେ ସନ୍ଧ୍ୟା ୬ଟାରେ ୧୯ ବର୍ଷୀୟ ପ୍ରଥମେଶ ରୋଲ୍ ଖାଇଥିଲେ। ପରଦିନ ୪ ମେ’ରେ ସକାଳ ୭ଟାରୁ ତାଙ୍କ ପେଟରେ ଯନ୍ତ୍ରଣା ସହ ବାନ୍ତି ହୋଇଥିଲା। ଘର ଲୋକେ ତୁରନ୍ତ ତାଙ୍କୁ ନିକଟରେ ଥିବା ଡାକ୍ତରଙ୍କ ପାଖକୁ ଚିକିତ୍ସା ପାଇଁ ନେଇଥିଲେ। ଆରାମ ଅନୁଭବ ହେବାରୁ ଘରକୁ ପଳାଇ ଆସିଥିଲେ। ଦିନ ଯାକ ଘରେ ଅନ୍ୟ କୌଣସି ଖାଦ୍ୟ ଖାଇନଥିଲେ।
ବିକ୍ରି ହେଉଛି ନକଲି ମସଲା ; ଏକଦମ୍ ସହଜ, ଏମିତି ଜାଣନ୍ତୁ ମସଲା ଅସଲି କି ନକଲି..
ମେ’୫ରେ ସକାଳ ୮ଟାରେ ପୁଣି ଥରେ ପ୍ରଥମେଶଙ୍କର ପେଟରେ ଯନ୍ତ୍ରଣା ଓ ବାନ୍ତି ଆରମ୍ଭ ହୋଇଥିଲା। ଏହାପରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ଏଠାରେ ମଧ୍ୟ ଡାକ୍ତର ଚିକିତ୍ସା ପରେ ତାଙ୍କୁ ଘରକୁ ପଠାଇଥିଲେ। ମାତ୍ର ପୁଣି ଥରେ ଯନ୍ତ୍ରଣା ଅନୁଭବ ହେବା କାରଣରୁ ପୁନଃ ହସ୍ପିଟାଲ ନିଆଯାଇଥିଲା। ଡାକ୍ତରଙ୍କ ଚିକିତ୍ସା ପରେ ମଧ୍ୟ ପ୍ରଥମେଶଙ୍କ ସ୍ୱାସ୍ଥ୍ୟାବସ୍ଥାରେ କୌଣସି ପରିବର୍ତ୍ତନ ହୋଇନଥିଲା। ମେ’୭ରେ ସକାଳ ପ୍ରାୟ ସାଢେ ୧୦ଟାରେ ତାଙ୍କର ମୃତ୍ୟୁ ହୋଇଥିଲା। ଏହି ଘଟଣା ପରେ ପୁଲିସ ଦୋକାନୀକୁ ଗିରଫ କରିବା ସହ ରୋଲର ନମୁନାକୁ ପରୀକ୍ଷା କରିବା ପାଇଁ ପଠାଯାଇଛି। ପ୍ରାଥମିକ ଯାଞ୍ଚ ଅନୁଯାୟୀ, ଖରାପ ଚିକେନରୁ ପ୍ରସ୍ତୁତ ଶୱାରମା ରୋଲ୍ ଖାଇବାରୁ ପ୍ରଥମେଶଙ୍କ ସ୍ୱାସ୍ଥ୍ୟାବସ୍ଥା ବିଗିଡିବା ପରେ ତାଙ୍କ ମୃତ୍ୟୁ ହୋଇଥିବା ଜଣାପଡିଛି। ପୁଲିସ ଅଭିଯୁକ୍ତଙ୍କୁ ପଚରାଉଚରା ଜାରି ରଖିଛି।
