ନବଜାତ ପୁଅର ସ୍ପର୍ଶରେ କୋମାରୁ ମୁକୁଳିଲା ମା’

ଫୋର୍ଟାଲେଜା : ମା’ ଓ ପିଲାର ସମ୍ପର୍କ ନିଅାଁରା। ମା’ର ମମତାର ସ୍ପର୍ଶରେ ପିଲାର ରୋଗ ଭଲ ହୋଇଯାଇଥିବାର ଅନେକ ନଜର ରହିଛି। ହେଲେ ଏବେ ଏକ ନବଜାତକର ସ୍ପର୍ଶରେ ମା’ କୋମା ଭଳି ଏକ ଅଧ୍ରୁବ ଅବସ୍ଥାରୁ ମୁକୁଳି ଆସିଛି। ଏଭଳି ଘଟଣା ଫୋର୍ଟାଲେଜା ସହରରେ ଘଟିଛି। ଏହା ଏକ ଅଲୌକିକ ଘଟଣା ଓ ଚିକିତ୍ସା ବିଜ୍ଞାନରେ ଏପରି ଉପଚାର ନାହିଁ ବୋଲି କୁହାଯାଉଛି।
ସୂଚନା ଅନୁସାରେ ୩୨ ସପ୍ତାହର ଗର୍ଭବତୀ ଥିବା ସମୟରେ ଆମାଣ୍ଡା ଡିସିଲ୍ଭା (୨୮) ନାମକ ମହିଳାଙ୍କ ନିଜ ସ୍ୱାମୀଙ୍କ ସହ ପ୍ରବଳ ଝଗଡ଼ା ହୋଇଥିଲା। ଏଥିରୁ ତାଙ୍କ ସ୍ୱାସ୍ଥ୍ୟାବସ୍ଥା ବିଗିଡ଼ି ଯାଇଥିଲା ଓ କିଛି ଦିନ ମଧ୍ୟରେ ସେ କୋମାକୁ ଚାଲିଯାଇଥିଲେ। ଆମାଣ୍ଡାଙ୍କ ପୂର୍ବରୁ ୩ଟି ପିଲା ଅଛନ୍ତି। ତେବେ ସେ କୋମାକୁ ଯିବା ପରେ ଡାକ୍ତରମାନେ ପେଟରେ ଥିବା ପିଲାକୁ ବଞ୍ଚାଇବାକୁ ସମସ୍ତ ପ୍ରୟାସ କରିଥିଲେ। ଶେଷରେ ଅସ୍ତ୍ରୋପଚାର ଦ୍ୱାରା ଆମାଣ୍ଡାଙ୍କ ଶିଶୁ ପୁତ୍ରକୁ ଦୁନିଆକୁ ଅଣାଯାଇଥିଲା। ଶିଶୁ ପୁତ୍ର ନାମ ଭିକ୍ଟର ରଖାଯାଇଥିଲା। ଜନ୍ମ ବେଳକୁ ମାତ୍ର ୨.୧ କିଲୋଗ୍ରାମ ହୋଇଥିବାରୁ ଭିକ୍ଟରକୁ ଜୀବନ ରକ୍ଷାକାରୀ ଯନ୍ତ୍ର ମଧ୍ୟରେ ରଖାଯାଇଥିଲା। ଭିକ୍ଟର ଜନ୍ମ ହେବାର ଦୁଇ ସପ୍ତାହ ପର୍ଯ୍ୟନ୍ତ ଆମାଣ୍ଡା କୋମାରେ ଥିଲେ। ସେ ଚାଲି ପାରୁନଥିଲେ, ନିଜ ଶରୀରକୁ ହଲାଇ ପାରୁନଥିଲେ କି କିଛି କଥା କହିପାରୁନଥିଲେ। ଏହି ସମୟରେ ଜଣେ ନର୍ସ ତାଙ୍କ ପୁଅକୁ ଆମାଣ୍ଡାଙ୍କ ଛାତି ଉପରେ ରଖିବା ପାଇଁ ପରାମର୍ଶ ଦେଇଥିଲେ। ନର୍ସଙ୍କ ପରାମର୍ଶ କ୍ରମେ ଭିକ୍ଟରକୁ ଆଣି ଆମାଣ୍ଡଙ୍କ ଛାତି ଉପରେ ରଖାଯାଇଥିଲା। ଭିକ୍ଟର ସ୍ପର୍ଶ କରିବା ମାତ୍ରେ ଆମାଣ୍ଡାଙ୍କ ହୃଦସ୍ପନ୍ଦନ ବଢିଗଲା, ତାଙ୍କ ଆଖିରୁ ଲୁହ ଗଡ଼ିବା ସହ ଆଙ୍ଗୁଠି ହଲିଥିଲା। ଏପରିକି ସେ ନିଜ ହାତରେ ଭିକ୍ଟରକୁ ସ୍ପର୍ଶ କରିଥିଲେ। ଏହାର ଠିକ୍‍ ୨୩ ଦିନ ପରେ ଆମାଣ୍ଡା ସମ୍ପୂର୍ଣ୍ଣ ଭାବେ କୋମାରୁ ମୁକୁଳି ଘରକୁ ଯିବା ସ୍ଥିତିରେ ପହଞ୍ଚିଥିଲେ। ଚିକିତ୍ସା ବିଜ୍ଞାନରେ ଏହା ଏକ ଉପଚାର ହୋଇନଥିଲେ ମଧ୍ୟ ମା’ ଓ ପୁଅର ସମ୍ପର୍କର ଅଲୌକିକ ଘଟଣାରୁ ଏହା ଗୋଟିଏ ବୋଲି କୁହାଯାଉଛି।