ଡେସ୍କ: ଜାତିସଂଘର ସଦ୍ୟତମ ସୂଚନା ଅନୁଯାୟୀ, ୨୦୨୧ରେ କରୋନା ମହାମାରୀ ଯୋଗୁ ବିଶ୍ୱର ପ୍ରାୟ ୭.୭ କୋଟିରୁ ଅଧିକ ଲୋକ ଦାରିଦ୍ର୍ୟର ସମ୍ମୁଖୀନ ହୋଇଥିଲେ। ସେ ସମୟରେ ସରକାର ଋଣ ସେବା ତଥା ଶୀଘ୍ର ଟିକା ଆଣିବାକୁ ଅଗ୍ରାଧିକାର ଦେଇଥିଲେ। ଜାତିସଂଘ ଗତକାଲି ପ୍ରକାଶିତ ଏକ ରିପୋର୍ଟରେ କହିଛି ଯେ ଧନୀ ଦେଶଗୁଡିକ କରୋନା ଭାଇରସ୍ ମହାମାରୀର ସବୁଠାରୁ ଅର୍ଥନୈତିକ ପ୍ରଭାବକୁ ଏଡ଼ାଇବାରେ ସଫଳ ହୋଇଥିଲେ କିନ୍ତୁ ଗରିବ ଲୋକ ଋଣ ଭାରରେ ବୁଡି ରହଥିଲେ।
ଜାତିସଂଘ ସୂଚନା ଅନୁଯାୟୀ, ଧନୀ ଦେଶମାନେ ଆୟର ୩.୫% ଋଣ ସେବା ନିମନ୍ତେ ବ୍ୟୟ କରୁଥିବା ବେଳେ କମ୍ ଧନୀ ଦେଶ ସେମାନଙ୍କର ୧୪% ପର୍ଯ୍ୟନ୍ତ ରାଜସ୍ୱ ବ୍ୟବହାର କରନ୍ତି। ରିପୋର୍ଟରେ ଦର୍ଶାଯାଇଛି ଯେ ୨୦୨୩ ଶେଷ ସୁଦ୍ଧା ପ୍ରାୟ ୨୦% ଦେଶ ମୁଣ୍ଡପିଛା ଜିଡିପି କ୍ଷେତ୍ରରେ ୨୦୧୯ର ପୂର୍ବ ସ୍ତରକୁ ଫେରିବେ ନାହିଁ। ଜାତିସଂଘ ଏହା ପୂର୍ବରୁ କହିଛି ଯେ ୟୁକ୍ରେନ ପରିସ୍ଥିତି ଦୃଷ୍ଟିରୁ ଖାଦ୍ୟ ଏବଂ ଇନ୍ଧନର ଆମଦାନୀ ଅନେକ ନିର୍ଭରଶୀଳ ଦେଶ ଉପରେ ପ୍ରଭାବ ପକାଉଛି।
