ମୋହନା ସ୍ୱାସ୍ଥ୍ୟକେନ୍ଦ୍ରର ଗୋଦାମ ଘର ଭୂତକୋଠି: କାମ ସରି ବିତିଲାଣି ୫ ବର୍ଷ, ବିଦ୍ୟୁତ ସଂଯୋଗ କେବେ ?

ମୋହନା: ରାଜ୍ୟ ଓ କେନ୍ଦ୍ର ସରକାରଙ୍କ ବହୁ ଯୋଜନା ମଧ୍ୟରୁ ସ୍ୱାସ୍ଥ୍ୟ ଯୋଜନା ଅନ୍ୟତମ । ନିରାମୟ ଯୋଜନାରେ ରୋଗୀଙ୍କୁ ରାଜ୍ୟ ସରକାର ମାଗଣା ଔଷଧ ଓ ମାଗଣା ଚିକିତ୍ସା ଯୋଗାଉଛନ୍ତି। ସରକାର ରାଜ୍ୟରେ ରହିଥିବା ବିଭିନ୍ନ ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ରଗୁଡିକରେ ବିଭିନ୍ନ ଔଷଧ ସୁରକ୍ଷିତ ରଖିବା ପାଇଁ ଲକ୍ଷ ଲକ୍ଷ ଟଙ୍କା ବ୍ୟୟରେ ନିର୍ମାଣ କରିଛନ୍ତି ଔଷଧ ଗୋଦାମ ଗୃହ। ଗଜପତି ଜିଲ୍ଲାର ସବୁଠାରୁ ବଡ଼ ବ୍ଲକ ମୋହନା। ଏଠାରେ ରହିଛି ୩୯ଟି ପଞ୍ଚାୟତ। ଏହି ପଂଚାୟତଗୁଡ଼ିକରେ ଥିବା ପ୍ରାଥମିକ ସ୍ଵାସ୍ଥ୍ୟକେନ୍ଦ୍ରଗୁଡିକୁ ମୋହନା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରୁ ଔଷଧ ପଠାଯାଏ। ଏପରିକି ମେଡ଼ିକାଲର ଭ୍ରମଣ ଗାଡିରେ ଏଠାରୁ ଔଷଧ ନେଇ ଡାକ୍ତର ଓ ସ୍ୱାସ୍ଥ୍ୟ କର୍ମୀମାନେ ଯାଇ ବ୍ଳକର ବିଭିନ୍ନ ବିଦ୍ୟାଳୟର ଛାତ୍ରଛାତ୍ରୀମାନଙ୍କୁ ଔଷଧ ବଣ୍ଟନ କରିଥାନ୍ତି। ଏହାକୁ ଦୃଷ୍ଟିରେ ରଖି ରାଜ୍ୟ ସରକାରଙ୍କ ଦ୍ୱାରା ମୋହନାରେ ଏକ ବଡ ଧରଣର ଗୃହରେ ଔଷଧ ଗଚ୍ଛିତ ରଖିବା ପାଇଁ ଏକ ଗୋଦାମ କୋଠା ନିର୍ମାଣ ହୋଇଛି। ଆଜିକୁ ପ୍ରାୟ ୫ବର୍ଷରୁ ଉର୍ଦ୍ଧ୍ବ ହେବ କୋଠା ନିର୍ମାଣ ହେବାର କିନ୍ତୁ କୋଠାର ଚତୁଃପାର୍ଶ୍ଵ ଲଟାବୁଦାରେ ପରିପୂର୍ଣ୍ଣ। ଗୋଦାମ ଘରେ କୋଟି କୋଟି ଟଙ୍କାର ଔଷଧ ଓ ଅନ୍ୟାନ୍ୟ ଆବଶ୍ୟକୀୟ ସାମଗ୍ରୀ ରହିଛି। କିନ୍ତୁ ପରିତାପର ବିଷୟ ଏଠାରେ ବିଦ୍ୟୁତ ସଂଯୋଗ ହୋଇନାହିଁ। ଘର ଭିତରେ ଓ ବାହାରେ ସୁଇଚ ବୋର୍ଡ଼ ଓ ତାର ବିଛା ଯାଇଛି। ଅନ୍ଧକାର ହୋଇ ପଡିରହିଛି ଗୃହ। ଆବଶ୍ୟକ ପଡ଼ିଲେ ଔଷଧ ଓ ଆବଶ୍ୟକୀୟ ସାମଗ୍ରୀ ନେବା ପାଇଁ କର୍ମଚାରୀମାନେ ମୋବାଇଲ ଲାଇଟ ବ୍ୟବହାର କରିଥାନ୍ତି। ଜିଲ୍ଲା ସ୍ୱାସ୍ଥ୍ୟ ଅଧିକାରୀଙ୍କ ଅବହେଳା ଯୋଗୁଁ ଦୀର୍ଘ ବର୍ଷ ହେଲା ଅନ୍ଧକାରରେ ଚାଲିଛି ଔଷଧ ଗୋଦାମ ଗୃହ।