ଚଳଚ୍ଚିତ୍ର ଦୃଶ୍ୟ ଠାରୁ ବଳିଗଲା, ନିଖୋଜ ନାବାଳିକା ଦଶ ଦିନ ପରେ କିମିର୍ଦ୍ଧାପଶିରୁ ଉଦ୍ଧାର

ପାଟଣା : ତୁରୁମୁଙ୍ଗା ଥାନା ଅନ୍ତର୍ଗତ ଖଜିରାପାଟ ପଞ୍ଚାୟତ ରଘୁନାଥପୁର ଗ୍ରାମର ଦଶମ ଶ୍ରେଣୀରେ ପଢୁଥିବା ଜନୈକା ନାବାଳିକା ଗତ ୪ ତାରିଖ ସନ୍ଧ୍ୟାରେ ଶୌଚ ପାଇଁ ଯାଇଥିବା ସମୟରେ ନିଖୋଜ ହୋଇଥିବା ନେଇ ଥାନାରେ ଏତଲା ହୋଇଥିଲା। ନାବାଳିକାକୁ କିମିର୍ଦ୍ଧାପଶି ଗ୍ରାମର ଜଣେ ଯୁବକ ପ୍ରଲୋଭନ ଦେଇ ନେଇଯାଇଥିବା ଝିଅର ବାପା ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗ ପାଇବା ପରେ ସଂପୃକ୍ତ ଯୁବକଙ୍କୁ ଥାନାକୁ ଡକାଯାଇ ପଚରା ଉଚରା କରାଯିବାରୁ ସେ ନାବାଳିକାକୁ ନେଇନଥିବା କହିବା ସହ ତାକୁ ଅଯଥାରେ ବଦନାମ କରାଯାଉଥିବା ଓଲଟି ଅଭିଯୋଗ ଆଣିଥିଲେ। ଆଶ୍ଚର୍ଯ୍ୟର କଥା ଏହିଯେ ନିଖୋଜ ନାବାଳିକାର ପତ୍ତା ଲଗାଇବାରେ ପୁଲିସ ବିଫଳ ହୋଇ ଆସୁଥିବା ଝିଅର ବାପା ଅଭିଯୋଗ କରିବା ସହ ଏସ.ପି ଙ୍କୁ ଭେଟିବେ ବୋଲି ଗତ ୧୨ ତାରିଖ ଗଣମାଧ୍ୟମକୁ ସୂଚନା ଦେଇଥିଲେ।
ତେବେ ଆଜି ଚଳଚ୍ଚିତ୍ର ଦୃଶ୍ୟ ଭଳି କିମିର୍ଦ୍ଧାପଶି ଗ୍ରାମର ସଂପୃକ୍ତ ଯୁବକଙ୍କ ଘର ପିଣ୍ଡାରେ ସକାଳେ ନାବାଳିକାଟି ବସିଥିବା ଖବର ପାଇ ତୁରୁମୁଙ୍ଗା ଥାନାଧିକାରୀ ସୁଶାନ୍ତ ମଣି ମହାନ୍ତି ଘଟଣା ସ୍ଥଳକୁ ଯାଇ ନାବାଳିକାକୁ ଉଦ୍ଧାର କରିବା ପରେ ତାଙ୍କ ପିତାଙ୍କୁ ରଘୁନାଥପୁର ଗ୍ରାମରେ ଜିମା ଦେଇଛନ୍ତି। ନାବାଳିକାଟି ଦଶ ଦିନ ହେଲା ଏଣେ ତେଣେ ବୁଲୁଥିବା ଓ କିଛି ଖାଇନଥିବା ସହ ସଂପୃକ୍ତ ଯୁବକକୁ ସେ ଜାଣିନଥିବା ଭଳି ବିଭ୍ରାନ୍ତିକର ବୟାନ ଦେଇଥିବାରୁ ଥାନା ପକ୍ଷରୁ ଅନ୍ୟ କିଛି କାର୍ଯ୍ୟାନୁଷ୍ଠାନ ହୋଇନଥିବା ଜଣାପଡିଛି।

Comments are closed.