ଲାଗିଲା ମାଓ ପୋଷ୍ଟର, ୨୪ ଘଣ୍ଟିଆ ବନ୍ଦ ଡାକରା

କଲ୍ୟାଣସିଂହପୁର : ଆସନ୍ତାକାଲି ଅର୍ଥାତ୍ ୧୩.୦୨.୨୦୨୫ ରେ ଓଡ଼ିଶା ଓ ପୂର୍ବ ଛତିଶଗଡ଼ ୨୪ ଘଣ୍ଟିଆ ବନ୍ଦ ଡାକରା ଦେଇଛି ନକ୍ସଲ ସଙ୍ଗଠନ । ଏକ ପୋଷ୍ଟର ମାରି ସଙ୍ଗଠନ ବନ୍ଦ ଡାକରା ଦେବା ସହ ଏହାକୁ ସଫଳ କରିବାକୁ ନିବେଦନ କରିଛି । ଏଥିରେ ପ୍ରବକ୍ତା ଚକରା ଓଡ଼ିଶା ରାଜ୍ୟ କମିଟି ବୋଲି ଦର୍ଶାଯାଇଛି। ଛତିଶଗଡ଼ ଗରିଆବନ୍ଧ ଜିଲା କୁଲାରିଘାଟ ଜଙ୍ଗଲରେ ୧୬ ମାଓବାଦୀଙ୍କ ବୀଭସ୍ୟ ହତ୍ୟାକୁ ନିନ୍ଦା କରାଯାଇଛି ।

ଜାନୁଆରୀ ସୁଦ୍ଧା ୩୩୫ ଜଣଙ୍କୁ ହତ୍ୟା କରାଯାଇଛି ଯେଉଁଥିରେ ୯୦ରୁ ଅଧିକା ଗ୍ରାମୀଣ ଆଦିବାସୀ ଅଛନ୍ତି । ପ୍ରତି ଏନକାଉଣ୍ଟର ପୁଲିସର ବଡ଼ ସଫଳତା ବୋଲି ଦର୍ଶାଯାଇଛି । ଏଣୁ ଏହା ବିରୋଧରେ ଫେବୃଆରୀ ୧୩ କୁ ୨୪ ଘଣ୍ଟିଆ ଓଡ଼ିଶା ଓ ପୂର୍ବ ଛତିଶଗଡ଼ ବନ୍ଦ ସଫଳ କରିବାକୁ ପୋଷ୍ଟରରେ ନିବେଦନ କରାଯାଇଛି । ଦେଶର ବଡ଼ବଡ଼ କର୍ପୋରେଟର କମ୍ପାନୀଙ୍କ ମନମୁଖୀ ଲୁଟର ସ୍ବାର୍ଥରେ ବିକଶିତ ଭାରତ ନାମରେ ୨୦୪୭ ସୁଦ୍ଧା ଭାରତକୁ ହିନ୍ଦୁରାଷ୍ଟ୍ର ବନାଇବା ଲକ୍ଷ୍ୟ ରଖିଛି ବିଜେପି। ଘରୋଇକରଣ ନାଁରେ ଦେଶର ପ୍ରାକୃତିକ ସମ୍ପଦ ଶିଳ୍ପକୁ କଉଡ଼ି ମୂଲ୍ୟରେ ପୋସ୍କୋ ,ବେଦାନ୍ତ, ଆଦାନୀ, ଅମ୍ବାନୀ ଓ ଜିନ୍ଦଲକୁ ପ୍ରଦାନ କରାଯାଉଛି ବୋଲି ପ୍ରେସ ବିଜ୍ଞପ୍ତିରେ ଉଲ୍ଲେଖ ରହିଛି। ଅନ୍ୟପଟେ ଏହି ପୋଷ୍ଟରକୁ ନେଇ ପ୍ରଶାସନିକ ପ୍ରତିକ୍ରିୟା ମିଳିପାରିନାହିଁ।