ପାଟଣା : ହରିଚନ୍ଦନପୁର ତହସିଲ ଅଞ୍ଚଳ ପଣ୍ଡାପଡା ଥାନା ଅନ୍ତର୍ଗତ ପଣ୍ଡାପଡା ଗ୍ରାମ ନିକଟସ୍ତ ଶାଳବେଡା ପଥର ଖାଦାନକୁ କିଛିଦିନ ହେବ ଏକ ଠିକା ସଂସ୍ଥା ସରକାରଙ୍କ ଠାରୁ ଲିଜ ଆଣି ଚଳାଉଅଛି । ଯାହାକି ପଣ୍ଡାପଡା ଗ୍ରାମ ଠାରୁ ମାତ୍ର ୧୮୦ ମିଟର ଦୂରତାରେ ଅବସ୍ତିତ ଏବଂ ପ୍ରାଥମିକ ବିଦ୍ୟାଳୟ, ମନ୍ଦିର, ରାଜରାସ୍ତା ଇତ୍ୟାଦି ମାତ୍ର ୩ଶହ ମିଟର ଭିତରେ ଅବସ୍ଥିତ । ସେଠାରେ ପଥର ଖନନ କଲାବେଳେ ବ୍ଲାଷ୍ଟିଙ୍ଗ ଦ୍ୱାରା ନିକଟସ୍ଥ ବସ୍ତି ସମ୍ପୂର୍ଣ୍ଣ ଧୂଳି ରେ ପ୍ରଦୂଷିତ ହେଉଥିବା ବେଳେ ଛୋଟ ଛୋଟ ପଥର ଖଣ୍ଡ ଘର ଉପରକୁ ଛିଟିକି ପଡୁଛି । ବ୍ଲାଷ୍ଟିଙ୍ଗ ସମୟରେ ପ୍ରଚଣ୍ଡ ଶବ୍ଦ ଦ୍ୱାରା ନିକଟସ୍ଥ ସମଗ୍ର ଅଞ୍ଚଳ ଥରି ଉଠୁଥିବା ବେଳେ ଆଖ ପାଖ ଘରର କାନ୍ଥ ରେ ବଡ଼ ବଡ଼ ଫାଟ ସୃଷ୍ଟି ହେଇଛି । ଏହା ଦ୍ୱାରା ସାଧାରଣ ଲୋକଙ୍କ ଜୀବନ ପ୍ରତି ବିପଦ ସୃଷ୍ଟି ହେଉଛି । ଏହାକୁ ନେଇ ଗ୍ରାମବାସୀ ବୃନ୍ଦ ଜିଲ୍ଲା ପ୍ରଶାସନର ଦ୍ୱାରସ୍ଥ ହୋଇ ଥିବାବେଳେ, ଜିଲ୍ଲା ପ୍ରଶାସନ ଏକ ଜନ ଶୁଣାଣି ଆୟୋଜନ କରିଥିଲେ । ଏହି ଠିକା ସଂସ୍ଥାର ବ୍ଲାଷ୍ଟିଙ୍ଗ ପରମିସନ ନଥିବାରୁ ସେଠାରେ କମ୍ପାନୀ ବ୍ଲାଷ୍ଟିଙ୍ଗ କରି ପାରିବ ନାହିଁ ବୋଲି ପ୍ରଶାସନ ନିର୍ଦେଶ ଦେଇଥିଲେ । ପରବର୍ତ୍ତୀ ସମୟରେ କମ୍ପାନୀ ବ୍ଲାଷ୍ଟିଙ୍ଗ ପରମିସନ ଆଣି ବେଆଇନ ଭାବରେ ପଥର ଖନନ କରୁଛି । ବ୍ଲାଷ୍ଟିଙ୍ଗ ପରମିସନର କୌଣସି ସର୍ତ୍ତ ପୂରଣ କରୁନଥିବା ବେଳେ କମ୍ପାନୀ କିପରି ବ୍ଲାଷ୍ଟିଙ୍ଗ ପରମିସନ ହାତେଇଲା ତାକୁ ନେଇ ସାଧାରଣରେ ସନ୍ଦେହ ସୃଷ୍ଟି ହୋଇଥିଲା । ସୂଚନା ଥାଉକି ଗତ ୧୧ ତାରିଖ ସଂଧ୍ୟା ୭ ଘଟିକା ସମୟରେ ଏକ ବଡ଼ ଧରଣର ବ୍ଲାଷ୍ଟିଙ୍ଗ ହୋଇଥିଲା । ପ୍ରଚଣ୍ଡ ଶବ୍ଦରେ ସମଗ୍ର ପଣ୍ଡାପଡା ଅଞ୍ଚଳ ଥରି ଉଠିଥିଲା । ପଥର ଖାଦାନକୁ ଲାଗିଥିବା ତେଲିସାହି ଓ ଧରାପଡାର ଯୁଆଙ୍ଗ ସାହି, ସମ୍ପୂର୍ଣ୍ଣ ଧୂଳିରେ ପରିପୂର୍ଣ ହୋଇ ଯାଇ ଥିବାବେଳେ ଛୋଟ ଛୋଟ ପଥର ଖଣ୍ଡ ଚାରିଆଡେ ଛିଟିକି ପଡିଥିଲା । ଏହି ଘଟଣା ପରେ ତେଲି ସାହି ଓ ଯୁଆଙ୍ଗ ସାହିର ଲୋକମାନେ ପଥର ଖାଦାନକୁ ଯାଇ ପ୍ରତିବାଦ କରିବାରୁ ସେଠାରେ କିଛି ସମୟ ପାଇଁ ଉତ୍ତେଜନା ପ୍ରକାଶ ପାଇଥିଲା । ପରଦିନ ଏହି ଠିକା କମ୍ପାନୀ ଖନନ କାର୍ଯ୍ୟ ବନ୍ଦ ରଖିବା ପରିବର୍ତ୍ତେ ଗ୍ରାମବାସୀଙ୍କ ବିରୋଧରେ ମାମଲା ରୁଜୁ କରିଥିଲା l କମ୍ପାନୀର ମନମୁଖୀ କାର୍ଯ୍ୟ କଳାପ ଓ ବେଆଇନ ପଥର ଖାଦାନ ବିରୋଧରେ ଗ୍ରାମବାସୀ ଉଚ୍ଚ ନ୍ୟାୟଳୟର ଦ୍ୱାରସ୍ଥ ହୋଇଛନ୍ତି । ଗ୍ରାମବାସୀଙ୍କ ତରଫରୁ ଏହି ଠିକା କମ୍ପାନୀ ବିରୋଧରେ ଏକ ଜନ ସ୍ୱାର୍ଥ ମାମଲା ଦାଏର ହୋଇଛି । ଉଚ୍ଚ ନ୍ୟାୟାଳୟର ବରିଷ୍ଠ ଆଇନଜୀବି ସରୋଜ କୁମାର ପାଢ଼ୀ ମାମଲା ପରିଚାଳନା କରୁଥିବା ବେଳେ, ଜିଲ୍ଲାପାଳ, ଉପଜିଲ୍ଲାପାଳ, ତହସିଲଦାର, ହରିଚନ୍ଦନପୁର, ରାଜସ୍ବ ନିରୀକ୍ଷକ, ରାଜ୍ୟ ପ୍ରଦୂଷଣ ବୋର୍ଡ, କେନ୍ଦୁଝର ଖଣି ଅଧିକାରୀ, ଜିଲ୍ଲା ଜଙ୍ଗଲ ଅଧିକାରୀଙ୍କୁ ମାମଲାରେ ପକ୍ଷଭୁକ୍ତ କରାଯାଇଛି।
Comments are closed.