ଲାଞ୍ଜିଗଡ଼: କଳାହାଣ୍ଡି ଜିଲା ଦକ୍ଷିଣ ବନଖଣ୍ଡ ଲାଞ୍ଜିଗଡ଼ ବ୍ଲକ ବିଶ୍ୱନାଥପୁର ବନାଞ୍ଚଳ ବିଜେପୁର ସେକସନ ଘାଟିକୁଣ୍ଡରୁ ଜଙ୍ଗଲରେ ବେଧଡ଼କ ଗଛ କଟାଯାଉଛି। ଘାଟିକୁଣ୍ଡରୁଠାରୁ ପାହାଡ଼ ପଦର ସଂଯୋଗ କରୁଥିବା ମୁଖ୍ୟରାସ୍ତାର ଦୁଇପାର୍ଶ୍ବରେ ହେକ୍ଟର ହେକ୍ଟର ଜଙ୍ଗଲ କାଟି ସଫା କରିଦିଆଯାଇଛି। ସେହି ରାସ୍ତା ଦେଇ ବିଜେପୁର ବନବିଭାଗ କର୍ମଚାରୀ ପ୍ରତିଦିନ ଯିବା ଆସିବା କରୁଥିଲେ ମଧ୍ୟ ଦୋଷୀଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ହେଉ ନ ଥିଲା। ଏ ନେଇ ସ୍ଥାନୀୟ ଲୋକେ ଅଭିଯୋଗ କରିବା ପରେ ବିଜେପୁର ବନବିଭାଗ ତତ୍ପରତା ଦେଖାଇ ୬ ଜଣଙ୍କୁ ଗିରଫ କରିଛି। ଅଭିଯୁକ୍ତମାନେ ହେଲେ ମଦନଗୁଡା ଗାଁର ଲାଞ୍ଜି ମାଝୀ(୫୫), ଦିପେନ ସୁନା(୨୦), ରାମ ମାଝୀ(୨୭), ସାଇବୁ ମାଝୀ(୨୩), ବନାଙ୍ଗ ମାଝୀ(୫୦) ଓ କାକୁଡା ମାଝୀ(୫୩)। ସମସ୍ତଙ୍କୁ କୋର୍ଟ ଚାଲାଣ କରାଯାଇଥିବା ବିଜେପୁର ଫରେଷ୍ଟର ପଦ୍ମଲୋଚନ ଶବର ସୂଚନା ଦେଇଛନ୍ତି।
ସୂଚନାଯୋଗ୍ୟ, ଉକ୍ତ ଜଙ୍ଗଲରେ ଶାଳ, ହରିଡ଼ା, ବାହାଡ଼ା, ଅଁଳା, ବିଜା ଭଳି ଅନେକ ମୂଲ୍ୟବାନ ଗଛକୁ ଅଭିଯୁକ୍ତମାନେ କାଟିଦେବା ସହିତ ଅବଶିଷ୍ଟାଂଶକୁ ପୋଡ଼ିଦେଇ ପୋଡୁ ଚାଷ କରୁଥିଲେ। ଏ ନେଇ ବନବିଭାଗ ପାଖରେ ଖବର ଥିଲେ ସୁଦ୍ଧା କୌଣସି ପଦକ୍ଷେପ ଗ୍ରହଣ କରାଯାଉ ନ ଥିଲା। ଫଳରେ ଜଙ୍ଗଲ ଧ୍ୱଂସ ହେଉଥିଲା। ଜଙ୍ଗଲୀ ବନ୍ୟଜନ୍ତୁ ଜନବସତି ମୁହାଁ ହେଉଥିଲେ।
