ସମାଜଲାଇଭ ଡେସ୍କ: ଚାକିରି ଦେବାକୁ ଡାକି ଯୁବତୀଙ୍କୁ ଦୁଷ୍କର୍ମ ଉଦ୍ୟମ କରାଯାଇଛି। ରାଜଧାନୀ ଭୁବନେଶ୍ଵରରେ ଏଭଳି ଘଟଣା ସାମ୍ନାକୁ ଆସିଛି। ପୀଡ଼ିତା ଏ ନେଇ ଥାନାରେ ଅଭିଯୋଗ କରିବା ପରେ ପୁଲିସ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି।
ସୂଚନା ଅନୁସାରେ, ଅଭିଯୁକ୍ତ ଜଣକ ହେଲେ ଖୋର୍ଦ୍ଧା ଜିଲା ଜଙ୍କିଆ ଥାନା ମଣିପୁର ପାଟଣାର ନରେଶ ଦଳେଇ। ପୀଡ଼ିତାଙ୍କ ଅଭିଯୋଗ ଅନୁସାରେ, ନରେଶ ନିଜର ପିଏ ରଖିବା ଲାଗି ଖବରକାଗଜରେ ବିଜ୍ଞାପନ ଦେଇଥିଲେ। ସେ ବିଜ୍ଞାପନ ଦେଖି ସାକ୍ଷାତକାର ଦେବାକୁ ଯାଇଥିଲେ। ଅଭିଯୁକ୍ତ ଏକ ହୋଟେଲରେ ସାକ୍ଷାତକାର ଥିବା କହି ଡକାଇଥିଲେ। ସେ ହୋଟେଲରେ ପହଞ୍ଚିବା ପରେ ତାଙ୍କ ସହିତ ଅସଦାଚରଣ କରିଥିଲେ। ଏପରି କି ଦୁଷ୍କର୍ମ ଉଦ୍ୟମ କରିଥିଲେ। ଉଲଗ୍ନ କରି ଭିଡିଓ ଉତ୍ତୋଳନ ବି କରିଥିଲେ। କୌଣସି ପ୍ରକାରେ ସେ ସେଠାରୁ ଖସି ଆସିବାରେ ସଫଳ ହୋଇଥିଲେ। ପୁଲିସ ଘଟଣାର ତଦନ୍ତ କରି ଅଭିଯୁକ୍ତକୁ ଗିରଫ କରିଛି।
