କଟକ: ୯ ମାସର ଛୁଆକୁ ଧରି ନଦୀକୁ ଡେଇଁପଡ଼ିଲା ବାପା। ସଦର ଥାନା ସଇଁଦା ନିକଟ ସିଢୁଆ ନଦୀରେ ଏହି ଅଭାବନୀୟ ଘଟଣା ଘଟିଛି। ପାରିବାରିକ କଳହରୁ ବାପା ଛୁଆକୁ ଧରି ଡେଇଁଥିବା ସୂଚନା ମିଳିଛି। ସ୍ଥାନୀୟ ଲୋକଙ୍କ ଦ୍ବାରା ଛୁଆକୁ ଉଦ୍ଧାର କରାଯାଇଛି। ଛୁଆକୁ ଉଦ୍ଧାର କରାଯିବା ପରେ ଚିକିତ୍ସା ପାଇଁ ମେଡ଼ିକାଲରେ ଭର୍ତ୍ତି କରାଯାଇଛି। ବାପାର ପତ୍ତା ମିଳୁନାହିଁ। ଅଗ୍ନିଶମ ବାହିନୀ ଦ୍ବାରା ଖୋଜାଖୋଜି ଜାରି ରଖିଛି।
ମିଳିଥିବା ସୂଚନା ଅନୁଯାୟୀ ସ୍ୱାମୀ-ସ୍ତ୍ରୀଙ୍କ ମଧ୍ୟରେ କୌଣସି କଥାକୁ ମନୋମାଳିନ୍ୟ ହୋଇଥିଲା। ଆଜି ମନ୍ଦିର ବୁଲାଇ ନେବା ବାହାନାରେ ବ୍ୟକ୍ତି ଜଣଙ୍କ ତାଙ୍କ ସ୍ତ୍ରୀ ଓ ୯ ମାସର ଝିଅକୁ ଧରି ଘରୁ ବାହାରିଥିଲେ। ସ୍ୱାମୀ-ସ୍ତ୍ରୀଙ୍କ ମଧ୍ୟରେ କ’ଣ ହେଲା ଓ ସେମାନେ କାହିଁକି ନଦୀବନ୍ଧ ନିକଟକୁ ଆସିଲେ ତାହା ଜଣାପଡ଼ିନାହିଁ। ତେବେ ସ୍ଥାନୀୟ ଲୋକଙ୍କ ଠାରୁ ମିଳିଥିବା ସୂଚନା ଅନୁଯାୟୀ ବ୍ୟକ୍ତି ଜଣଙ୍କ ଛୁଆଟିକୁ ଧରି ନଦୀ ଆଡ଼କୁ ଯାଉଥିବା ବେଳେ ତାଙ୍କ ସ୍ତ୍ରୀ ବାଧା ଦେବାକୁ ଚେଷ୍ଟା କରିଥିଲେ। କିନ୍ତୁ ସେ ପଥରରେ ତାଙ୍କ ପତ୍ନୀଙ୍କୁ ଆକ୍ରମଣ କରିବାକୁ ପ୍ରୟାସ କରିବା ସହିତ ନଦୀକୁ ଡେଇଁ ପଡ଼ିଥିଲେ। ସେଠାରେ ଉପସ୍ଥିତ କିଛି ଲୋକ ସଙ୍ଗେ ସଙ୍ଗେ ନଦୀକୁ ଡେଇଁ ୯ ମାସର ଛୁଆକୁ ଉଦ୍ଧାର କରିଥିଲେ। ଛୁଆଟିକୁ ନଦୀରୁ ଉଦ୍ଧାର କରି ସେମାନେ ମା’ ସହିତ ଡାକ୍ତରଖାନାକୁ ନେଇଥିଲେ। ଛୁଆଟିର ଅବସ୍ଥା ଗୁରୁତର ଥିବା ଜଣାପଡ଼ିଛି। ପୁଲିସ୍ ଘଟଣାସ୍ଥଳରେ ପହଞ୍ଚିଥିବା ବେଳେ ଅଗ୍ନିଶମ ବାହିନୀ ପକ୍ଷରୁ ନିଖୋଜ ସ୍ବାମୀଙ୍କୁ ଖୋଜା ଜାରି ରହିଛି।
Comments are closed.