ଦେବଗଡ଼: ବାରକୋଟ ଥାନା ଅନ୍ତର୍ଗତ ବାଲରୋଇ ଗ୍ରାମର ଜଣେ ଯୁବକଙ୍କର ଧାନବିଲକୁ ମାଛ ମାରିବାକୁ ଯାଇ ପାଣିରେ ପଡି ମୃତ୍ୟୁ ଘଟିଥିବା ଜଣାପଡିଛି।
ପୁଲିସ ସୁତ୍ରରୁ ମିଳିଥିବା ସୂଚନା ଅନୁଯାୟୀ, ବାଲିରଇ ଗ୍ରାମର ଝାଂଟୁ ହରିଜନଙ୍କ ପୁଅ ବୁଲୁ ଜରିଜନ(୩୨) ମାଛ ମାରିବା ପାଇଁ ନିଜର ଧାନ ବିଲରେ ମୁଗୁରା ବସାଇଥିଲେ। ଗତକାଲି ଅପରାହ୍ନରେ ଉକ୍ତ ମୁଗୁରାକୁ ଯାଞ୍ଚ କରିବା ପାଇଁ ଯାଇଥିଲେ ହେଁ କିଛି ସମୟ ପରେ ସେ ଧାନବିଲରେ ପାଣି ଭିତରେ ମୁହଁମାଡି ପଡିରହିଥିଲେ। ବୁଲୁ ପାଣି ଭିତରେ ମୁହଁମାଡି ପଡିଥିବା କେତେକ ଗ୍ରାମବାସୀ ଦେଖି ପରିବାର ଲୋକଙ୍କୁ ଜଣାଇଥିଲେ। ପରିବାର ଲୋକେ ସେଠାରୁ ଗୁରୁତର ଅବସ୍ଥାରେ ତାଙ୍କୁ ଉଦ୍ଧାର କରି ଚିକିତ୍ସା ନିମନ୍ତେ ବାରକୋଟ ଡାକ୍ତରଖାନାକୁ ନେଇଥିଲେ। ମାତ୍ର ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ଡାକ୍ତରଖାନା କର୍ତ୍ତୃପକ୍ଷଙ୍କ ଠାରୁ ସୂଚନା ପାଇ ବାରକୋଟ ଥାନା ପୁଲିସ ଏକ ଅପମୃତ୍ୟୁ ମାମଲା ରୁଜୁ କରିବା ସହ ଘଟଣାର ତଦନ୍ତ ଆରମ୍ଭ କରିଛି। ଆଜି ପାଳଲହଡା ଡାକ୍ତରଖାନାରେ ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି।
