ଡେସ୍କ: ପଶ୍ଚିମବଙ୍ଗର ଶିଳ୍ପଗୁଡିକ ପାଇଁ ଆବଶ୍ୟକ ପଡୁଥିବା ଲୁହାପଥର ଓଡିଶାରୁ ନେବାକୁ ମମତା ଆଗ୍ରହୀ। ୩ ଦିନିଆ ଓଡିଶା ଗସ୍ତରେ ଥିବା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଆଜି ଅପରାହ୍ନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସାକ୍ଷାତ କରିଛନ୍ତି।ଏହି ସାକ୍ଷାତ ସମୟରେ ସୁଶ୍ରୀ ବାନାର୍ଜୀ ପୁରୀରେ ‘ବଙ୍ଗୋ ଭବନ’ ନିର୍ମାଣ ନିମନ୍ତେ ଉଦ୍ଦିଷ୍ଟ ଜମି କାଗଜପତ୍ର ହସ୍ତାନ୍ତର କରିଛନ୍ତି।
ତେବେ ସୁଶ୍ରୀ ବାନାର୍ଜୀ ସାମ୍ବାଦିକମାନଙ୍କ ପ୍ରଶ୍ନର ଉତ୍ତରରେ କହିଛନ୍ତି ଯେ ସେ ଓଡିଶା ଆସିବା ପୂର୍ବରୁ କୋଲକାତା ବାଣିଜ୍ୟ ମଣ୍ଡଳ ତାଙ୍କୁ ଲୁହାପଥର ଉପଲବ୍ଧତା ସମ୍ପର୍କରେ ଅବଗତ କରାଇଥିଲା। ସେ କହିଛନ୍ତି ଯେ ପଶ୍ଚିମବଙ୍ଗରେ ଲୁହାପଥର ନାହିଁ କିନ୍ତୁ ଓଡିଶାରେ ଏହା ପ୍ରଚୁର ମାତ୍ରାରେ ଉପଲବ୍ଧ ହେଉଛି। ସେଠାକାର ଶିଳ୍ପଗୁଡିକ ପାଇଁ ଯଦି ଓଡିଶାରୁ ଲୁହାପଥର ଉପଲବ୍ଧ ହୋଇପାରିବ ତେବେ ଉଭୟ ଓଡିଶା ଓ ପଶ୍ଚିମବଙ୍ଗକୁ ନେଇ ଲୁହାପଥର ଶିଳ୍ପ କରିଡର ଗଠନ କରାଯାଇ ପାରିବ। ଏ ନେଇ କୋଲକାତା ବାଣିଜ୍ୟ ମଣ୍ଡଳର ଅନୁରୋଧ ପତ୍ର ସୁଶ୍ରୀ ବାନାର୍ଜୀ ମୁଖ୍ୟମନ୍ତ୍ରୀଙ୍କୁ ହସ୍ତାନ୍ତର କରିଥିବା ଜଣାପଡିଛି।
