ଉତ୍କଳ କେଶରୀ ଡ.ହରେକୃଷ୍ଣ ମହତାବଙ୍କ ୧୨୦ ତମ ଜନ୍ମ ବାର୍ଷିକୀ

ଭୁବନେଶ୍ୱର: ସ୍ୱାଧୀନତା ପୂର୍ବ ଓ ସ୍ବାଧୀନୋତ୍ତର ଭାରତ ବର୍ଷରେ ଜନମତକୁ ସଚେତନ ଓ ସଶକ୍ତ କରିବାରେ ଡ.ମହତାବଙ୍କର ଭୂମିକା ବଳିଷ୍ଠ ଥିଲା। ତାଙ୍କର ଜୀବନୀ, ଦର୍ଶନ ଓ ରଚନାବଳୀ, ଓଡ଼ିଆ ସାମ୍ବାଦିକତାର ପାଠ୍ୟକ୍ରମରେ ଅନ୍ତର୍ଭୁକ୍ତ କରାଯିବାକୁ ବକ୍ତାମାନେ ପରାମର୍ଶ ଦେଇଥିଲେ। ଉତ୍କଳ କେଶରୀ ଡ.ହରେକୃଷ୍ଣ ମହତାବଙ୍କ ୧୨୦ ତମ ଜନ୍ମ ବାର୍ଷିକୀ ପାଳନ ଅବସରରେ ‘ଓଡ଼ିଆ ସାମ୍ବାଦିକତାର ନବ ଦିଗନ୍ତ:ଡ.ମହତାବ’ ଶୀର୍ଷକ ଆଲୋଚନାଚକ୍ରରେ ଅନୁଷ୍ଠିତ ହୋଇଥିଲା। ଏଥିରେ ଦେଶବିଦେଶରୁ ବହୁ ବକ୍ତା ଅଂଶଗ୍ରହଣ କରି କହିଥିଲେ ଯେ ସାମ୍ବାଦିକତାକୁ ଲୋକାଭିମୁଖୀ କରିବାରେ ଉତ୍କଳ କେଶରୀ ଡ.ହରେକୃଷ୍ଣ ମହତାବଙ୍କର ଅବଦାନ ଓ ଯୋଗଦାନ ଅଦ୍ୱିତୀୟ ଥିଲା। ପ୍ରକୃତ ଘଟଣା କ’ଣ ଜାଣିବା, ଜନସାଧାରଣଙ୍କୁ ଜଣାଇବା ଏବଂ ଏ ନେଇ ଜନମତକୁ ଜାଗ୍ରତ କରିବାରେ ଡ. ମହତାବ ସିଦ୍ଧହସ୍ତ ଥିଲେ ବୋଲି ତାଙ୍କର ୧୨୦ ତମ ଜନ୍ମ ବାର୍ଷିକୀ ପାଳନ ଅବସରରେ ଆୟୋଜିତ ଜାତୀୟ ୱେବିନାରରେ ବିଶିଷ୍ଟ ବକ୍ତା ମାନେ ମତ ପ୍ରକାଶ କରିଛନ୍ତି। ଇନ୍‌ଷ୍ଟିଚ୍ୟୁଟ୍‌ ଅଫ ମେଡିଆ ଷ୍ଟଡ଼ିଜ ଦ୍ୱାରା ଆୟୋଜିତ ଏହି ୱେବିନାରରେ ନିର୍ଦେଶକ ଉପେନ୍ଦ୍ର ପାଢ଼ୀ ସ୍ୱାଗତ ଭାଷଣ ପ୍ରଦାନ କରିଥିଲେ । ଗିରିଶ ସ୍ୱାଇଁ ସଭା ସଞ୍ଚାଳନ କରିଥିବାବେଳେ କିଶୋର ଦ୍ୱିବେଦୀ ଧନ୍ୟବାଦ ଅର୍ପଣ କରିଥିଲେ। କାର୍ଯ୍ୟକ୍ରମରେ ସ୍ତମ୍ଭକାର ଅରୁଣ କୁମାର ପଣ୍ଡା, ବିଶିଷ୍ଟ ସାହିତ୍ୟିକ ପ୍ରଫେସର ବାଉରୀବନ୍ଧୁ କର, ସାମ୍ବାଦିକ ପ୍ରଦ୍ୟୁମ୍ନ ଶତପଥୀ, ଗୋବିନ୍ଦ ଚନ୍ଦ୍ର ଚାନ୍ଦ, ଦୀପକ ସାମନ୍ତରାୟ, ପବିତ୍ର ମହାରଥା, ଅମିତାଭ ଖିଲାର,ବିରୁପାକ୍ଷ ତ୍ରିପାଠୀ, ଓ ଶୁଭେନ୍ଦୁ ଭୂୟାଁ ପ୍ରମୁଖ। ସାଂସଦ ଭର୍ତ୍ତୃହରି ମହତାବ, ଅଷ୍ଟ୍ରେଲିଆ ଓଡ଼ିଆ ସଂଘର ସଭାପତି ନଳିନୀ ପତି, ଦୁବାଇ ସ୍ଥିତ ୟୁଏଇ. ଓଡିଶା ସମାଜର ସାଧାରଣ ସମ୍ପାଦକ ପ୍ରିତିଶ ଦାସ,ଆମେରିକାରୁ ଧୀରେନ୍ଦ୍ର କର,ଦିଲ୍ଲୀରୁ ପଞ୍ଚଯାତ ବିଭାଗର ସଂଯୁକ୍ତ ସଚିବ ସଞ୍ଜୀବ ପାଟଜୋଷୀ , ମୁମ୍ବାଇରୁ ଚଳଚିତ୍ର ତାରକା ଆଶିଷ ମିଶ୍ର, ବାଙ୍ଗାଲୋରରୁ ସାହିତ୍ୟିକ ଶଶଧର ଦାସ , ନଏଡାରୁ ଶ୍ରାବଣୀ ସ୍ୱାଇଁ , କଲିକତା ଉତ୍କଳ ଶିକ୍ଷା ସଂସଦର ଉପ ସଭାପତି ପିତାମ୍ବର ବାରିକ ଏବଂ ଭୁବନେଶ୍ୱରରୁ ହୃଷିକେଶ ପାତ୍ର ପ୍ରମୁଖ ଏଥିରେ ଅଂଶଗ୍ରହଣ କରିଥିଲେ।