ହାଇଦରାବାଦ: ମହେଶ ବାବୁ ଓ ନମ୍ରତା ଶିରୋଦକରଙ୍କ ଝିଅ ସିତାରା ଘଟ୍ଟାମନେନୀ ସାଇବର ଅପରାଧର ଶିକାର ହୋଇଛନ୍ତି। ୧୧ ବର୍ଷୀୟା ସିତାରାଙ୍କର ଏକ ନକଲି ଇନଷ୍ଟାଗ୍ରାମ ଆକାଉଣ୍ଟ କରାଯାଇଛି, ଯେଉଁଥିରେ ସେ ନିଜକୁ ମହେଶ ବାବୁଙ୍କ ଝିଅ ବୋଲି କହିବା ସହ ୟୁଜରମାନଙ୍କୁ ବାଣିଜ୍ୟ ଓ ନିବେଶ ଲିଙ୍କ୍ ମଧ୍ୟ ପଠାଉଛି।
ସିତାରାଙ୍କ ମାଆ ନମ୍ରତା ଏ ସମ୍ବନ୍ଧରେ ମହେଶ ବାବୁଙ୍କ ଟିମ୍ ଦ୍ବାରା ଏକ ବିଧିବଦ୍ଧ ବିବୃତି ଜାରି କରିଛନ୍ତି। ସେ ଅଭିଯୁକ୍ତଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ମଧ୍ୟ ଚେତାବନୀ ଦେଇଛନ୍ତି। ନମ୍ରତା ଲେଖିଛନ୍ତି, ସାବଧାନ! ଏହା ହେଉଛି @sitarghattamaneniଙ୍କ ଏକମାତ୍ର ଆକାଉଣ୍ଟ। ଏହା ଆକାଉଣ୍ଟ ବ୍ୟତୀତ ଅନ୍ୟ କୌଣସି ହ୍ୟାଣ୍ଡେଲ ବିଶ୍ୱାସଯୋଗ୍ୟ ନୁହେଁ।
ବିବୃତ୍ତିରେ ମହେଶ ବାବୁଙ୍କ ଟିମ୍ ଶେୟାର କରିଛନ୍ତି ଯେ, ପୁଲିସ ଅଧିକାରୀମାନେ ଏହି ମାମଲାର ତଦନ୍ତ କରୁଛନ୍ତି। ସିତାରାଙ୍କ ନକଲି ଆକାଉଣ୍ଟ ସୃଷ୍ଟି କରିଥିବା ବ୍ୟକ୍ତିଙ୍କୁ ଧରିବା ପାଇଁ ମଧ୍ୟ ଯଥା ସମ୍ଭବ ଉଦ୍ୟମ କରାଯାଉଛି। ଏହି ସାଇବର ଅପରାଧ ସମ୍ପର୍କରେ ପୁଲିସ ଚେତାବନୀ ଦେଇଛି। ଜଣେ ଅଜ୍ଞାତ ୟୁଜର ନିଜକୁ ସିତାରା ବୋଲି ପରିଚୟ ଦେଇ ଅନ୍ୟ ୟୁଜରମାନଙ୍କୁ ବାଣିଜ୍ୟ ଏବଂ ବିନିଯୋଗ ଲିଙ୍କ୍ ପଠାଉଛି।
