ବ୍ରହ୍ମପୁର: ପୁଲିସ ପରିଚୟ ଦେଇ ଦୁର୍ବୃତ୍ତମାନେ ଜଣେ ମହିଳାଙ୍କ ଠାରୁ ସୁନା ହାର ଲୁଟି ନେଇଥିବା ଅଭିଯୋଗ ହୋଇଛି । ଗୁରୁବାର ଦିନ ମହିଳା ଜଣଙ୍କ ମନ୍ଦିରରୁ ଦର୍ଶନ ସାରି ଫେରୁଥିବା ବେଳେ ଦିନ ପ୍ରାୟ ୧୧ଟା ୪୦ ମିନିଟରେ ଏହି ଘଟଣା ଘଟିଛି । ବ୍ରହ୍ମପୁରରେ ଜନଗହଳିପୂର୍ଣ ସ୍ଥାନରେ ବାରମ୍ବାର ଏଭଳି ଘଟଣା ଅସଲି ପୁଲିସର ମୁଣ୍ଡବ୍ୟଥା ବଢ଼ାଇ ଦେଇଛି ।
ସୂଚନାଯୋଗ୍ୟ, ମିଲିଟାରୀ ଲାଇନର ଦଳୁଆସହି ନିକଟରେ ଥିବା ମନ୍ଦିରରୁ ଦର୍ଶନ ସାରି ମହିଳା ଜଣଙ୍କ ଚାଲି ଚାଲି ଫେରୁଥିବା ବେଳେ ୩ ଜଣ ଦୁର୍ବୁତ୍ତ ତାଙ୍କୁ ପାଖକୁ ଡାକିଥିଲେ । ପୁଲିସ ବୋଲି ପରିଚୟ ଦେଇ ଆଇକାର୍ଡ଼ ଦେଖାଇଥିଲେ । ଆଗରେ ପୁଲିସ ଯାଞ୍ଚ ହେଉଛି ତେଣୁ ସୁନାହାର କାଢି ଆମକୁ ଦେଇଦିଅ ବୋଲି ଦୁର୍ବୁତ୍ତ ମାନେ ମହିଳାଙ୍କୁ କହିଥିଲେ । ମହିଳା ଜଣଙ୍କ ସୁନାହାର ବେକରୁ କାଢି ଦେବା ପରେ ଦୁର୍ବୃତ୍ତ ମାନେ ଘଟଣାସ୍ଥଳରୁ ବାଇକ ଯୋଗେ ଫେରାର ହୋଇଯାଇଥିଲେ । ବ୍ରହ୍ମପୁରରେ ଗତ କିଛି ମାସ ଭିତରେ ଏଭଳି ୭ଟି ଘଟଣା ଘଟିଯାଇଥିବାରୁ ପୁଲିସର ଚିନ୍ତା ବଢି ଯାଇଛି । ଟାଉନ ଥାନା ପୁଲିସ ସହ ନିଜେ ବ୍ରହ୍ମପୁର ଏସପି ପିନାକ ମିଶ୍ର ଘଟଣାସ୍ଥଳକୁ ଯାଇ ତଦନ୍ତ ଆରମ୍ଭ କରିଛନ୍ତି ।
