ନୂଆଦିଲ୍ଲୀ: ଲୋକସଭା ନିର୍ବାଚନ ୨୦୨୪ରେ କାହାକୁ ମିଳିବ ବହୁମତ। କିଏ ମାରିବ ବାଜି ତାହାକୁ ନେଇ ଆଲୋଚନା ପର୍ଯ୍ୟାଲୋଚନା ଜାରି ରହିଛି। ଟିଭି-୯ ପକ୍ଷରୁ ହୋଇଥିବା ଏକ ସର୍ଭେରୁ ଜଣାପଡିଛି ଯେ ପଶ୍ଚିମବଙ୍ଗରେ ୪୨ଟି ଲୋକସଭା ଆସନରେ ବିଜେପି ଓ ତୃଣମୂଳ କଂଗ୍ରେସ ମଧ୍ୟରେ କଡା ଟକ୍କର ହେବ। ସର୍ଭେ ଅନୁସାରେ ପଶ୍ଚିମବଙ୍ଗରେ ୪୨ଟି ଆସନରୁ ଟିଏମସିକୁ ୨୧ଟି ଆସନ ମିଳିବା ବେଳେ ବିଜେପିକୁ ମିଳିବ ୨୦ଟି । ସେହିପରି ଗୁଜୁରାଟ ଓ ମଧ୍ୟପ୍ରଦେଶରେ ସବୁ ଆସନରେ ବିଜେପି ବାଜିମାତ କରୁଥିବା ସର୍ଭେରୁ ଜଣାପଡିଛି।
ପାହାଡି ରାଜ୍ୟରୁ ସଫା ହୋଇଯିବ କଂଗ୍ରେସ:
ଟିଭି-୯ ସର୍ଭେ ଅନୁସାରେ ପାହାଡିଆ ରାଜ୍ୟ ଅର୍ଥାତ ହିମାଚଳ ପ୍ରଦେଶ ଓ ଉତ୍ତରାଖଣ୍ଡରେ ବିପୁଳ ଭୋଟରେ ବିଜୟ ହେବ ବିଜେପି। ହିମାଚଳର ୪ଟି ଲୋକସଭା ସିଟରେ ବିପୁଳ ବିଜୟ ହାସଲ କରିବ ଏନଡିଏ। କଂଗ୍ରେସ ରାଜ୍ୟ ଶାସନରେ ଥାଇ ମଧ୍ୟ ଗୋଟିଏ ବି ସିଟ୍ରେ ଜିତିପାରିବ ନାହିଁ। ଏଠାରେ ଏନଡିଏର ଭୋଟ ପ୍ରତିଶତ ରହିବ ୫୫.୭୩। ସେହିପରି ଉତ୍ତରାଖଣ୍ଡର ୫ଟି ଲୋକସଭା ଆସନ ବିଜେପି କବଜାରେ ରହିବ। ଏଠାରେ ଏନଡିଏକୁ ୫୬.୭୭ପ୍ରତିଶତ ଭୋଟ ମିଳିବ। ଇଣ୍ଡି ମେଣ୍ଟକୁ ମାତ୍ର ୨୬.୨୪ପ୍ରତିଶତ ଭୋଟ ମିଳିବ ବୋଲି ସର୍ଭେ କହୁଛି।
ଦିଲ୍ଲୀରେ ଖାତା ଖୋଲିବ ଆପ୍:
ଦିଲ୍ଲୀର ୭ଟି ଲୋକସଭା ଆସନରୁ ମାତ୍ର ଗୋଟିଏ ଆସନ ଆପ୍ ଖାତାକୁ ଯାଇପାରେ। ସର୍ଭେ ଅନୁସାରେ ପୂର୍ବ ଦିଲ୍ଲୀ ଆସନରେ ବିଜୟୀ ହୋଇପାରେ ଆମ ଆଦମୀ ପାର୍ଟି। ଏହାବ୍ୟତୀତ ଦିଲ୍ଲୀର ୬ଟି ଯାକ ଆସନରେ ବିଜେପି ବାଜି ମାରିବ। ଏଠାରେ ବିଜେପିକୁ ୫୩.୪୭ ପ୍ରତିଶତ ଭୋଟ ଏବଂ ଇଣ୍ଡି ମେଣ୍ଡକୁ ୩୩.୦୫ ପ୍ରତିଶତ ଭୋଟ ମିଳିବ।
