ଭୁବନେଶ୍ବର(ବ୍ୟୁରୋ): ଆଉ ରକ୍ଷା ନାହିଁ । ଏଥର ଫୋନ ପ୍ରେମିକଙ୍କୁ ଅପେକ୍ଷା କରିଛି ଥାନା ହାଜତ । କରୋନା ସଂକ୍ରାନ୍ତ ସ୍ବାସ୍ଥ୍ୟ ସୂଚନା, ପଞ୍ଜିକରଣ ନିମନ୍ତେ ରାଜ୍ୟ ସରକାରଙ୍କ ପକ୍ଷରୁ ଖୋଲା ଯାଇଥିବା ହେଲ୍ପ ଲାଇନ ନମ୍ବର ୧୦୪କୁ ଫୋନ୍ କରି ସୂଚନାଦାତ୍ରୀଙ୍କୁ ‘ଆଇ ଲଭ୍ ୟୁ’ କହିଥିବା ବ୍ୟକ୍ତିଙ୍କ ବିରୋଧରେ ରୁଜୁ ହୋଇଛି ମାମଲା । ରାଜଧାନୀର ସହିଦନଗର ଥାନାରେ ୩୮ ଜଣ ଏପରି ବଦମାସଙ୍କ ବିରୋଧରେ ମାମଲାରୁଜୁ କରିଛି ପୁଲିସ ।
୧୦୪ ପରି ଜରୁରୀ ସେବାକୁ କିଛି ଲୋକ ନିଜର ମନୋରଞ୍ଜନ ମାଧ୍ୟମ ରୂପେ ବ୍ୟବହାର କରିଥିଲେ । କିଏ କହୁଥିଲା ମୁଁ ତୁମକୁ ଭଲ ପାଏ, କିଏ ପଚାରୁଥିଲା- ତୁମ ନାଁ କଣ? କିଏ ପୁଣି କହୁଥିଲା ଡ଼ାଲି ବଘାରିବା ବେଳେ ମୋତେ ଛିଙ୍କ ହେଉଛି । ଏପରି ଘଟଣାକୁ ନେଇ କଠୋର ହୋଇଛି ପୁଲିସ ପ୍ରଶାସନ । ୧୦୪କୁ ଦୈନିକ ହଜାର ହଜାର ଫୋନ୍ କଲ୍ ଆସୁଥିବାବେଳେ ଏପରି କିଛି ବଦମାସଙ୍କ ଯୋଗୁଁ କଲ୍ ସେଣ୍ଟରରେ କାର୍ଯ୍ୟ କରୁଥିବା ଯୁବକଯୁବତୀମାନେ ଅସ୍ତବ୍ୟସ୍ତ ହୋଇ ପଡ଼ିଥିଲେ । ଏପରିକି କେବଳ ଗୋଟିଏ ନମ୍ବରରୁ ୧୦୪କୁ ସର୍ବାଧିକ ୨୭୯ ଥର କଲ୍ ଆସିଥିବା ସୂଚନା ମିଳିଥିଲା । କରୋନା ଭଳି ମାରାତ୍ମକ ଭୂତାଣୁର ସଂକ୍ରମଣ ରୋକିବା ସହ ବିଦେଶ ଫେରନ୍ତାଙ୍କ ପଞ୍ଜୀକରଣ ଉଦ୍ଦେଶ୍ୟରେ କାର୍ଯ୍ୟକାରୀ କରୁଥିବା ଏହି ନମ୍ବରକୁ କିଛି ଅସାମାଜିକ ବ୍ୟକ୍ତିମାନେ କଲ୍ କରି ହଇରାଣ କରୁଥିବା ଘଟଣା ସାମ୍ନାକୁ ଆସିଥଲା ।
