ସବୁଦିନ ରାତିରେ ବିଳମ୍ବରେ ଖାଇବା ଓ ଶୋଇବା ଆଜିକାଲି ଲୋକେ ନିଜର ଦୈନନ୍ଦିନ ଜୀବନଶୈଳୀରେ ସାମିଲ କରିଦେଇଛନ୍ତି। ବିଶେଷ କରି ଆଧୁନିକ ଜୀବନଶୈଳୀର ଏହା ଏକ ମୁଖ୍ୟ ଅଂଶ। କିଛି ଲୋକ ଅଧିକ ରାତି ଯାଏ ଅନିଦ୍ରା ରହିବା ସହ ଘଣ୍ଟା ଘଣ୍ଟା ଧରି ଟେଲିଭିଜନ୍ ଦେଖିବା ବା ଲାପଟପ୍ ଆଗରେ ବସି କାମ କରିବା ଦ୍ଵାରା ବିଳମ୍ବିତ ରାତିରେ ଭୋଜନ କରନ୍ତି। ଏହାଦ୍ୱାରା ସେମାନେ ବିଳମ୍ବରେ ଶୁଅନ୍ତି ଏବଂ ସକାଳେ ବିଳମ୍ୱରେ ବିଛଣା ମଧ୍ୟ ତ୍ୟାଗ କରନ୍ତି। ଫଳରେ ଏହି ଲୋକମାନେ ଅନେକ ରୋଗର ଶିକାର ହୁଅନ୍ତି। ତେବେ ଚାଲନ୍ତୁ ଜାଣିବା ବିଳମ୍ବିତ ରାତିରେ ଖାଦ୍ୟ ଖାଇବା ଦ୍ଵାରା ଶରୀରରେ କିପରି କୁପ୍ରଭାବ ପଡ଼ିଥାଏ –
ଓଜନ ବୃଦ୍ଧି ହୁଏ – ରାତିରେ ଅଧିକ ବିଳମ୍ବରେ ଖାଇବା ଦ୍ଵାରା ଖାଦ୍ୟ ହଜମ ହୋଇ ନଥାଏ। ଫଳରେ ଶରୀରରେ କୋଲେଷ୍ଟ୍ରଲ୍ ବୃଦ୍ଧି ପାଏ ଓ ହୃଦରୋଗର ଆଶଙ୍କା ମଧ୍ୟ ବଢିଥାଏ। ଏଥିସହିତ ଓଜନ ମଧ୍ୟ ବଢ଼ିଥାଏ।
ମାନସିକ ଦୁଶ୍ଚିନ୍ତା ବୃଦ୍ଧି ପାଏ – ବିଳମ୍ବିତ ରାତିରେ ଭୋଜନ କରିବା ଦ୍ବାରା ରାତିରେ ଭଲ ନିଦ ମଧ୍ୟ ହୋଇ ନଥାଏ। ଫଳରେ ସକାଳୁ ଅଧିକ ଅଳସୁଆ ଲାଗେ ଓ କୌଣସି କାମ କରିବାକୁ ଇଚ୍ଛା ହୋଇ ନଥାଏ। ଏହା ଦ୍ୱାରା ମାନସିକ ଦୁଶ୍ଚିନ୍ତା ମଧ୍ୟ ବଢ଼ିଥାଏ।
ଉଚ୍ଚ ରକ୍ତଚାପ ସମସ୍ୟା – ବିଳମ୍ବିତ ରାତିରେ ଖାଇବା ଦ୍ୱାରା ଶରୀରରେ ଖାଦ୍ୟ ଭଲ ରୂପେ ହଜମ ହୋଇ ନଥାଏ ଏବଂ ଏହି କାରଣରୁ ଉଚ୍ଚ ରକ୍ତଚାପର ଶିକାର ହେବାକୁ ପଡ଼ିଥାଏ।
ବଦହଜମି – ଯେଉଁମାନଙ୍କର ବଦହଜମି ସମସ୍ୟା ପୂର୍ବରୁ ରହିଛି, ସେମାନେ ବିଳମ୍ବିତ ରାତି ଯାଏ ଆଦୌ ଭୋକିଲା ରୁହନ୍ତୁ ନାହିଁ। ଏହାଦ୍ଵାରା ବଦହଜମି ଅଧିକ ହେବାର ଆଶଙ୍କା ବଢ଼ିଥାଏ।
ନିଦ ହୋଇ ନଥାଏ – ବିଳମ୍ବିତ ରାତିରେ ଖାଇବା ଯୋଗୁଁ ହଜମ ହୋଇ ନ ଥାଏ ଓ ବେଳେ ବେଳେ ପେଟରେ ଯନ୍ତ୍ରଣା ହୁଏ। ଏହାଫଳରେ ଆପଣଙ୍କୁ ଠିକ ଭାବେ ନିଦ ମଧ୍ୟ ଲାଗି ନ ଥାଏ।
ବିରକ୍ତି ଭାବ – ବିଳମ୍ବିତ ରାତିରେ ଖାଇବା ଯୋଗୁଁ ରାତିରେ ନିଦ ଅଳ୍ପ ହୁଏ ଏବଂ ସଠିକ ପରିମାଣର ନିଦ୍ରା ନହେବା ଦ୍ଵାରା ଆପଣ ବିଶ୍ରାମ ଅଭାବ କାରଣରୁ ଅଧିକ ଚିଡ଼ିଚିଡ଼ା ହୋଇ ଯାଆନ୍ତି।
ମଧୁମେହ – ରାତିରେ ବିଳମ୍ବରେ ଖାଇବା ଦ୍ଵାରା ଶରୀରରେ ଶର୍କରାର ପରିମାଣ ବଢିଯାଏ। ଏହା ପରେ ମଧୁମେହର ରୂପ ନିଏ। ତେଣୁ ରାତିରେ ଶୀଘ୍ର ଖାଇବା ପରେ ଅଳ୍ପ ଚଲାବୁଲା କରନ୍ତୁ।
