ଲାଞ୍ଜିଗଡ: ରାଜ୍ୟ ସରକାର ପ୍ରତି ଘରକୁ ପାଇପ୍ ଯୋଗେ ପାଣି ଯୋଗାଇ ଦେବାକୁ ସଂକଳ୍ପ ନେଇଥିବାବେଳେ ସହରାଞ୍ଚଳରେ ଏଥିରେ ସଫଳତା ଯୋଗୁଁ ସ୍ପେନର ମାଦ୍ରିଦଠାରେ ଅନୁଷ୍ଠିତ ବିଶ୍ବ ଜଳ ଅଧିବେଶନରେ ଓଡ଼ିଶାକୁ ଗ୍ଲୋବାଲ୍ ୱାଟର ଲିଡର ଆୱାର୍ଡ ପୁରସ୍କାର ମିଳିଛି । ତେବେ ୨୪ ଘଣ୍ଟିଆ ପାଇପ୍ ଯୋଗେ ପିଇବା ପାଣି ଯୋଗାଇଦେବା ପାଇଁ ରାଜ୍ୟ ସରକାର ବିଶ୍ବସ୍ତରୀୟ ପୁରସ୍କାର ହାସଲ କରୁଥିବା ବେଳେ ରାଜ୍ୟର କଳାହାଣ୍ଡି ବିଶେଷ କରି ଜିଲ୍ଲାର ଲାଞ୍ଜିଗଡ଼ ବ୍ଲକ ଅଞ୍ଚଳରେ ସରକାରଙ୍କ ଏଇସବୁ ଯୋଜନା ଫସର ଫାଟିବାରେ ଲାଗିଛି ।
ବ୍ଲକରେ ବସୁଧା ଯୋଜନାରେ କାର୍ଯ୍ୟକ୍ଷମ ହେଉଥିବା ଅଧିକାଂଶ ଓଭରହେଡ ଟ୍ୟାଙ୍କରେ ନିର୍ମାଣାଧୀନ ତ୍ରୁଟି, ନିମ୍ନମାନର କାମ ଯୋଗୁଁ ଜଳ ସଂରକ୍ଷଣ ହୋଇପାରୁନଥିବା ବେଳେ ନିମ୍ନମାନର ପାଇପ ବିଛାଯାଇଥିବାରୁ ଶେଷମୁଣ୍ଡରେ ପାଣି ପହଞ୍ଚି ପାରୁନାହିଁ । ରକ୍ଷଣାବେକ୍ଷଣ ଓ ମରାମତି ଅଭାବରୁ ଏସବୁ ପ୍ରକଳ୍ପ ଏବେ ଲୋକଙ୍କ କାମରେ ଲାଗୁନାହିଁ କହିଲେ ଚଳେ ।
ବ୍ଲକର ଦଶରୁ ଅଧିକ ସ୍ଥାନରେ ବସୁଧା ଯୋଜନା ଦ୍ବାରା ପାନୀୟ ଜଳ ଯୋଗାଣ ପାଇଁ ନଳକୂଅ ଖୋଳା ସରିଥିବାବେଳେ ଟେଣ୍ଡର ପ୍ରକ୍ରିୟା ଶେଷ ହୋଇ ତିନିମାସ ବିତିଗଲାଣି କିନ୍ତୁ ଟେଣ୍ଡର ପାଇଥିବା ଠିକାଦାରମାନେ କାମ ଆରମ୍ଭ କରୁନାହାନ୍ତି । ଏଣୁ ପଞ୍ଚାୟତିରାଜ ଓ ପାନୀୟ ଜଳ ଯୋଗାଣ ବିଭାଗ ଏଥିପ୍ରତି ଦ୍ରୁଷ୍ଟି ଦେଇ ଲାଞ୍ଜିଗଡ଼ ବ୍ଲକ ଅଞ୍ଚଳରେ ନିମ୍ନମାନର ବସୁଧା ପ୍ରକଳ୍ପଗୁଡ଼ିକର ଉଚ୍ଚସ୍ତରୀୟ ତଦନ୍ତ ସହିତ ଟେଣ୍ଡର ପ୍ରକ୍ରିୟା ଶେଷ ହୋଇଥିବା ପ୍ରକଳ୍ପଗୁଡ଼ିକର କାର୍ଯ୍ୟ ତ୍ବରାନ୍ବିତ କରିବାକୁ ସାଧାରଣରେ ଦାବି ହେଉଛି ।
Comments are closed.