ରେଙ୍ଗାଲିକ୍ୟାମ୍ପ: ଅତାବିରା ବ୍ଲକ ସରଣ୍ଡା ଛକ ନିକଟ ଜାତୀୟ ରାଜପଥ ୫୩ କଡରେ ଥିବା ସମଲେଶ୍ବରୀ ରାଇସମିଲ ଭିତରେ କାମ କରୁଥିବା ଜଣେ ଶ୍ରମିକ ସାପ କାମୁଡ଼ାରେ ପ୍ରାଣ ହରାଇଛନ୍ତି। ମୃତ ଶ୍ରମିକ ହେଲେ ରାଜେଶ ରୋହିଦାସ।
ସୂଚନାଯୋଗ୍ୟ, ରାଜେଶ ରାଇସ ମିଲରେ କାମ କରୁଥିବା ସମୟରେ ହଠାତ ଏକ ବିଷାକ୍ତ ସାପ କାମୁଡି ଦେଇଥିଲା । ମିଲ ଭିତର ପରିବେଶ ଆବର୍ଜନାମୟ ହୋଇଥିବାରୁ ଭିତରକୁ ସାପଟି ପଶି ଯାଇଥିଲା ବୋଲି ଶ୍ରମିକ ମାନେ ପ୍ରକାଶ କରିଛନ୍ତି। ସାପ କାମୁଡ଼ିବା ପରେ ରାଜେଶଙ୍କ ଅବସ୍ଥା ତୁରନ୍ତ ଗୁରୁତର ହୋଇପଡ଼ିଥିଲା। ତାଙ୍କୁ ସଙ୍ଗେ ସଙ୍ଗେ ବୁର୍ଲା ଡାକ୍ତରଖାନାକୁ ନିଆଯାଇଥିଲା। ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ବ୍ୟବଚ୍ଛେଦ ହୋଇ ରାଇସମିଲ ସମ୍ମୁଖରେ ପହଞ୍ଚିବା ପରେ କ୍ଷତିପୂରଣ ପୂରଣ ଯୋଗାଇଦେବା ପାଇଁ ଅନ୍ୟ ଶ୍ରମିକମାନେ ଦାବି କରିଥିଲେ। ଏହାକୁ ନେଇ ଉତ୍ତେଜନା ପ୍ରକାଶ ପାଇଥିଲା।
ଖବରପାଇ ଅତାବିରା ପୁଲିସ ଘଟଣା ସ୍ଥଳରେ ପହଞ୍ଚି ତଦନ୍ତ କରିଥିଲେ। ଏହି ସମୟରେ ଦେଖିବାକୁ ମିଳିଥିଲା ଯେ ରାଇସମିଲ ଭିତରେ ଓ ବାହାରେ ଆବର୍ଜନା ପଡି ରହିଛି। ଯଦ୍ୱାରା ଏହା ମଶା ମାଛି ତଥା ବିଷାକ୍ତ ସରୀସୃପମାନଙ୍କର ଆଶ୍ରୟସ୍ଥଳୀ ପାଲଟିଛି। ବିଭାଗୀୟ ଅଧିକାରୀ ଓ ମାଲିକମାନେ ଏସବୁକୁ ଠିକ ଭାବେ ଦୃଷ୍ଟି ଦେଉ ନ ଥିବାରୁ ଏଭଳି ଘଟଣା ଘଟୁଛି ବୋଲି ସାଧାରଣରେ ଚର୍ଚ୍ଚା ହେଉଛି। ରାଜେଶଙ୍କର ୧୩ ବର୍ଷର ଝିଅ ଓ ୧୧ ବର୍ଷର ପୁଅ ସହିତ ସ୍ତ୍ରୀ ଦସବନ୍ତି ଓ ବୃଦ୍ଧା ମା’ ରହିଛନ୍ତି। ତାଙ୍କ ପରିବାରକୁ କ୍ଷତିପୂରର ଦେବାକୁ ଦାବି ହୋଇଛି।
