ନିବେଶକ ସମ୍ମିଳନୀର ପ୍ରଭାବ:ଭୁବନେଶ୍ୱରରେ ହେବ କର୍ଲଅନ ମ୍ୟାଟ୍ରେସ ପ୍ଲାଣ୍ଟ

ନୂଆଦିଲ୍ଲୀ: “ମେକ ଇନ ଓଡ଼ିଶା’ ବ୍ୟାନରରେ ମୁଖ୍ୟମନ୍ତ୍ରୀ ପୁଞ୍ଜିନିବେଶକାରୀଙ୍କୁ ଓଡ଼ିଶାରେ ପୁ୍‍ଞ୍ଜିନିବେଶ ପାଇଁ ଆହ୍ୱାନ କରିବାର କିଛି ଘଣ୍ଟା ମଧ୍ୟରେ ରାଜ୍ୟକୁ ବଡ଼ ଧରଣର ସଫଳତା ମିଳିଛି। ଦେଶର ବହୂଳ ବ୍ୟବହୃତ କର୍ଲଅନ ମ୍ୟାଟ୍ରେସ କମ୍ପାନୀ ଭୁବନେଶ୍ୱରରେ ୬୫୦୦ଲକ୍ଷ ଟଙ୍କା ବ୍ୟୟ ଅଟକଳରେ ଏକ ପ୍ଲାଣ୍ଟ ନିର୍ମାଣ କରିବାକୁ ଘୋଷଣା କରିଛି କମ୍ପାନୀର ମୁଖ୍ୟ ମାର୍କେଟିଂ ଅଧିକାରୀ ଆଶୁତୋଷ ବୈଦ୍ୟ। ଏହି ପ୍ଲାଣ୍ଟ ଦିନକୁ ୨୫୦୦ଟି ମ୍ୟାଟ୍ରେସ ପ୍ରସ୍ତୁତ କରିବ। ଏଥିପାଇଁ ରାଜ୍ୟ ସରକାର ଭୁବନେଶ୍ୱର ଉପକଣ୍ଠରେ ୧୯ଏକର ଜାଗା ଯୋଗାଇ ଦେବେ। ପରବର୍ତ୍ତୀ ସମୟରେ ଏହି ପ୍ଲାଣ୍ଟର କ୍ଷମତା ଦିନକୁ ୪୫୦୦ଟି ମ୍ୟାଟ୍ରେସରେ ବୃଦ୍ଧି କରାଯିବ। ଭୁବନେଶ୍ୱରରୁ ନିର୍ମିତ ମ୍ୟାଟ୍ରେସ ବିହାର, ଝାଡ଼ଖଣ୍ଡ ଓ ପଶ୍ଚିମବଙ୍ଗ ଓ ଉତ୍ତର ପୂର୍ବ ଭାରତରେ ବିକ୍ରି ହେବ। ସେହିପରି କମ୍ପାନୀ ଆସାମରେ ମଧ୍ୟ ଏକ ପ୍ଲାଣ୍ଟ ନିର୍ମାଣ କରିବାକୁ ଯାଉଛି। ଏହି ପ୍ଲାଣ୍ଟରେ ସୋଫା ଓ ଅନ୍ୟାନ୍ୟ ଆସବାବପତ୍ରର ଗଦି ନିର୍ମାଣ କରିବ କମ୍ପାନୀ। କମ୍ପାନୀ ପକ୍ଷରୁ ସମଗ୍ର ରାଜ୍ୟରେ ୨୦୦ଟି ଷ୍ଟୋର ଖୋଲିବାର ଯୋଜନା ମଧ୍ୟ ରହିଛି। ସେଗୁଡ଼ିକ ମଧ୍ୟରୁ ୧୦୦ଟି କମ୍ପାନୀ ଦ୍ୱାରା ସିଧାସଳଖ ବିକ୍ରି ବ୍ୟବସ୍ଥା କରାଯିବ। ୨୦୨୦ ମଧ୍ୟରେ କମ୍ପାନୀ ରାଜ୍ୟରେ ବ୍ୟାପକ ପୁଞ୍ଜିନିବେଶ କରିବାର କାର୍ଯ୍ୟକ୍ରମ ରହିଛି।